Patani ti Pidigan

PATANI TI PIDIGAN. Nakaramankayon iti napablad a nagango a bukel ti patani (pulomingko)? Naimas a kas met la iti napablad a bukel ti bitsuelas, utong, kardis kdp. Aglalo no masagpawan iti pata ti baboy wenno tinuno a karne ti kamanokan sa malaokan iti rangaw ti paria, wenno marunggay. Manmano a masarakan kadagiti tiendaan ti nagango a bukel ti patani ta kadawyan a 'tay naganus ti adda. Iti Narvacan, Ilocos Sur, no aldaw ti tienda iti Domingo, adda aglako iti sinako a pusi a patani a naggapu pay idiay Pidigan, Abra a kas iti bambantayan daytoy a nagaget nga ina. Sangagasut a pisos ti sangasalup, wenno no sangasidaan laeng, mabalinmo ti gumatang iti pasar ti sangagantilia a P25. (Roy V. Aragon)

(Naipablaak iti Bannawag, Hunio 8, 2015 a bilang.)

Tulong a pinansial kadagiti estudiante iti kolehio, OK iti Senado

Inanamongan ti Senado itay lawasna iti maikatlo ken maudi a pannakaibasana ti gakat a mangikalawa iti scholarship program ti gobierno babaen ti panangtedna iti tulong a pinansial kadagiti nakurapay ngem maiparbeng nga estudiante agingga iti malpasda ti napilida a kurso iti man pribado wenno publiko a kolehio wenno unibersidad.

Kinuna ni Senate President Pro Tempore Ralph Recto nga ipaay ti Senate Bill 2679 (Unified Student Financial Assistance System for Tertiary Education wenno UniFAST Act) dagiti nadumaduma a tulong kadagiti estudiante tapno maturposda dagiti kursoda a kas iti student loans, subsidized tuition wenno libre pay ketdi a tuision para kadagiti nakurapay ngem masirib nga estudiante.

Adalen pay maminsan dagiti bicameral conference committees ti Senado ken ti Kamara (House of Representatives) ti napagkaysa a gakat sakbay nga aprobaranda ken kalpasanna, papirmaandanto ken ni Presidente Aquino tapno agbalin a linteg.

Maysa kadagiti naiserrek nga enmienda iti napagkaysa a gakat ti probision nga awan ti asino man nga estudiante a naaprobaran a maikkan iti tulong ti saan a makapagtuloy iti kolehio gapu iti kaawan ti pondo.

Nainayon iti nasao nga enmienda a dagiti tallo a kangatuan a graduado kadagiti amin a public high schools ti maikkan iti prioridad a maipayan iti student loan.

Apaman met a makalpas ti estudiante iti kolehio ken addan trabahona, mabalinna metten a rugian a bayadan nga in-inut ti utangna.


(Naipablaak iti Bannawag, Hunio 8, 2015 a bilang.)

Miting ti GUMIL Metro Manila: Hunio 6

Maangay ti miting dagiti opisial ken kameng ti GUMIL Metro Manila, ti gunglo dagiti mannurat nga Ilokano iti Kamanilaan, itoy a Hunio 6, iti alas dose iti aldaw, babaen ti panagsangaili da agkaingungot a Martin ken Teresita Rochina iti pagtaengan dagitoy iti Rizal, Makati City.

Mapagpapatangan iti nasao a miting dagiti proyekto ti gunglo ken ti pannakaangay ti Maika-49 nga Anibersario ti GMM inton Disiembre 2015.

Para iti dadduma a saludsod, makiuman iti 0927 561 7827 (Aileen B. Serrano).


(Naipablaak iti Bannawag, Hunio 8, 2015 a bilang.)

Pasnaan 6, agawaten iti aplikasion

Agawaten ti GUMIL Filipinas (GF), ti gunglo dagiti mannurat nga Ilokano iti Filipinas ken ballasiw-taw, kadagiti aplikante iti 6th Pasnaan Ilokano Writers Workshop (Pasnaan 6) a manamnama a maangay inton apagtapog ti Septiembre iti maysa a kolehio iti Ilokos.

Masapul a mangidatag ti tunggal aplikante, babaen ti e-mail, iti portfolio ti ania man kadagiti sumaganad: (a) uppat a daniw; (b) dua nga ababa a sarita, (c) uppat a daniw a para ubbing, (d) dua a sarita a para ubbing, (e) dua a non-fiction a salaysay, a naisurat iti Ilokano nga addaan iti title page a nakailanadan ti parbo a nagan ti mannurat ken linaonna (table of contents). Masapul a naka-Word format ti nasao a portfolio.

Amin a manuskrito, karamanna ti sabali a Word file a naglaon iti pudno a nagan ti autor, adres, pakakontakan a numero, e-mail address, ken ababa a pakasaritaan ti biag (bionote) ken 1 X 1 ID picture. May-e-mail amin nga aplikasion iti asseng.tabag@gmail.com ken usaren ti paulo (subject) a “Pasnaan 6.”

Sangapulo a fellow ti mapili, maibatay iti idatagda a portfolio. Kas fellow, awan ti nasken a bayadanda a makipasnaan.

Aggibus ti panagidatag iti aplikasion iti Hulio 15, 2015. Para iti ad-adu pay nga impormasion, umawag wenno ag-text iti 0921 602 1938 wenno ag-e-mail iti asseng.tabag@gmail.com. (Pasnaan 6 Secretariat)


(Naipablaak iti Bannawag, Hunio 8, 2015 a bilang.)

HUNIO 8, 2015

SARITA
6 Ni Catharina ken Dagiti Namaris a Bato ti Namacpacan
    Juan S.P. Hidalgo, Jr.

NOBELA
12 Operation: Drop Venus (16)
     Norberto D. Bumanglag, Jr.
16 Siak ni Precious (13)
     Juan Al. Asuncion

DANIW
26 Panangsinga
      Jake F. Ilac
47 Dandaniw a Para Ubbing
     Roselyn C. Campano/Delfin P. Dumayas

SALAYSAY
10 Kayatmo ti Agbasa iti TESDA?
      Gregorio T. Amano
20 Bucay: Ti Sigud a Kabesera ti Abra
      Bernard G. Lumaoig
40 Dagitoy, a, ti Mani!
     Reynaldo E. Andres

KOMIKS
27 Gayang ni Lam-ang (87)
30 Aritosan (137)
32 Miks & Tiks

KOLUM
14 Saludsodem ken ni Apo Hues
15 Dear Doc
22 Okeyka, Apong
23 TIPS
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Kasano ti Mapaggayyemmo da Aso ken Pusa?
24 Nalaing a Mannalon Dagitoy a Soldado
34 Ammuem Pay Dagitoy
37 Panangimaton iti Pagtaengan
38 Napananen Dagiti Bisukol?
39 Ti Gasatmo Ita a Lawas
46 Idi Un-unana a Panawen

Siraragsak

SIRARAGSAK nga inaribungbongan dagiti agdakdaklis ken dagiti napan nakipagguyod iti daklis iti baybay ti Caroan, Gonzaga, Cagayan ti kaisangsang-at a bubo ti daklis. Masansan a maibingayan nga umuna dagiti nakipagguyod sakbay a mailako kadagiti komprador ti nakalap nga ikan. Munamon ken bilis ti kaaduanna a maal-ala dagiti mangngalap a kas iti adda iti ladawan. (Roselyn C. Campano)

(Naipablaak iti Bannawag, Hunio 1, 2015 a bilang.)

NBI Clearance, nagbalin a simple ti panangala

Iti panggepna a makatulong kadagiti umili a makaala a madagdagus ken iti nalaklaka a wagas kadagiti dokumento manipud iti gobierno, kinissayanen ti National Bureau of Investigation (NBI) dagiti addang iti pannakaproseso ti NBI Clearance.

Manipud iti 6 nga addang, kinuna ni NBI Director Virgilio Mendez a nagbalin a tallo nga addang laengen.

Mangrugi ti tallo-nga-addang a proseso iti 1. Online registration, appointment ken e-payment; 2. Photo capture and fingerprint biometrics; ken 3. Clearance printing.

Babaen ti online registration, appointment ken e-payment, kuna ni Director Mendez a maliklikanen ti atiddog a pila iti panangala iti NBI Clearance.

Mabalin ti ag-register online iti NBI Clearance website www.clearance.nbi.gov.ph. Kompletuen ti application form iti clearance website, mangala iti appointment date, sa kalpasanna, agbayad iti processing fee.

Para iti online banking, kinuna ni Mendez a dagiti kustomer nga addaan iti local internet banking access, mabalinda ti agbayad online babaen ti panangusarda iti real-time debit iti account-da iti: BDO, BPI, Metrobank, RCBC, Unionbank, UCPB, Chinabank, PNB, Maybank, Sterling Bank ken Eastwest Bank.

Wenno mabalin met nga agbayad dagiti aplikante iti Bayad Center ken LBC wenno iti Robinsons Department Store.

Adda payen tie-up ti NBI iti Globe telecom para iti mobile payment.

Iti aldaw ti appointment, kuna ni Mendez a mabalin a mapan ti aplikante iti ania man kadagiti 72 nga NBI clearance processing centers iti sapasap a pagilian para iti Photo Capture ken Fingerprint Biometrics ken Clearance Printing.

(Naipablaak iti Bannawag, Hunio 1, 2015 a bilang.)