Lambanog ti Aparri

LAMBANOG TI APARRI. Nagaget daytoy nga agtutubo ti Brgy. Cappi-Navagan, Aparri, Cagayan nga agluto iti arak manipud iti tubbog ti tata wenno nipa a kangrunaan nga industria kadagiti barangay iti laud ti ili. Mapa a P250-P350 ti sanga-container agbatay iti panawen ta adda dagiti tiempo a bassit ti agbalin a pagsabongan ti tata gapu iti nakaro nga angin wenno panagdinakkel ti danum ti karayan. Mailaklako dagiti arak (lambanog) kadagiti ili a Ballesteros, Abulug, Allacapan iti Cagayan ken kadagiti ili a Flora, Sta. Marcela, Luna ken Pudtol iti Apayao. (Jobert M. Pacnis)

(Naipablaak iti Bannawag, Marso 13, 2017 a bilang.)

Sadut nga empleado dagiti LGU, naballaagan

Amin nga empleado dagiti gobierno lokal, masapul nga agtrabahoda iti di nakurkurang ngem 8 nga oras iti tunggal aldaw a kaadda ti serrek; no saan, agur-uray ti dusa kadakuada.

Daytoy ti imballaag ni Dept. of the Interior and Local Government (DILG) Secretary Ismael Sueno tapno maisardengen ti pannakauy-uyaw dagiti empleado ti gobierno gapu iti mapalpaliiw a dida panangipingpinget iti panagtrabahoda.

Iti babaen ti Omnibus Rules Implementing Book V of Executive Order No. 292, kinuna ni Sueno nga amin nga opisial ken empleado dagiti amin a departamento ken ahensia, nasken nga agtrabahoda iti di nakurkurang ngem walo nga oras iti inaldaw iti uneg ti lima nga aldaw iti makalawas, saan a mairaman ditoy ti oras a panangaldawda.

Innayon ni Sueno a maipaay ti disciplinary action kadagiti opisial ken empleado a masansan a maladladaw ken di mangipapaay iti kompleto nga oras ti panagtrabaho uray pay mano laeng a minuto iti tunggal aldaw, iti mamin-10 a daras iti makabulan iti dua nga agsaganad a bulan.

Ti masansan a saan nga autorisado a panaglangan wenno naipakadawyan a di iseserrek iti trabaho, kinaladaw a sumrek iti trabaho, ken saan a panagtrabaho iti lugar a pagtrabahuan bayat ti regular nga oras ti panagtrabaho ket maibilang a nadagsen a pakabasolan a maipaayan iti dusa a pannakasuspende iti innem a bulan agingga iti makatawen para iti umuna a panagbasol ken pannakaikkat iti trabaho para iti maikadua a panagbasol.

(Naipablaak iti Bannawag, Marso 13, 2017 a bilang.)

17 a sarita, naisalip iti 19th AMMA Foundation Literary Awards

Sangapulo ket pito a sarita ti naawat ti Secretariat ti AMMA Foundation Literary Awards a para iti maika-19 nga edision ti salip iti panagsurat iti sarita a para kadagiti agdadamo a mannurat iti Ilokano.

Naggibus ti salip idi Enero 31, 2017.

Dagiti sarita ken parbo a nagan dagiti autor:

“Ti Gasat ni Lucky” ni Bisah G. Pilde, “Dung-awak Met ti Ipupusayyo Gayyem” ni Gia Mae Santana, “Ayat ken Pammakawan” ni Tano Gadul, “Witiwit” ni Love U. Dada, “Agsublikan, Baket” ni X;

“Tribu ni Cain” ni Ben Thor Rotor, “Baggak” ni Ronnie Carabbay, “Ti Ayag, Lumboy, Kulalanti ken Kampilan” ni Domingo Dagsi Banay, “Karit” ni Car Eat, “Ti Un-unnoy ni Ma’am Judy” ni Y;

“Doktor Siegfrid” ni Kemoy Marcus, “Sapata” ni Marie Gatan, “Gitebgiteb iti Barukong” ni Prety Boy Lee, ”Atang” ni Roy, “Lakay Angkuan: Ama ti Puli” ni Susan Dy; “Awanen ti Kas Kenka a Nabukelen” ni Dirty Harry, ken “Burboran” ni Malalaki ti Amianan.

Kinuna dagiti esponsor (Amado ken Gloria Yoro, Francisco ken Aurora Ponce, ken Alfredo ken Cherry Quibol, agpapada nga agindegen iti Hawaii) a mapadayawan dagiti mangabak bayat ti Maika-49 a Nailian a Kombension ti GF a maangay iti Siudad ti San Fernando, La Union itoy nga Abril.

Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw.


(Naipablaak iti Marso 13, 2017 a bilang.)

Guling-guling Festival ti Paoay

GULING-GULING FESTIVAL TI PAOAY. Maysa a buya ti sala a mangipakpakita iti kabibiag dagiti taga-Paoay, Ilocos Norte idi panawen dagidi Kastila agingga iti agdama. Tinawen a ramrambakan ti nasao nga ili ti Guling-guling wenno Kurkuros (pannakaimarka ti krus iti muging, wenno Ash Wednesday) a mangipakita iti kinarelihioso dagiti agindeg ditoy. Naipabuya ti sala iti mismo a sango ti San Agustin Church, maysa kadagiti daydaywen dagiti turista ken maibilang a UNESCO Cultural Heritage. (Aileen R. Rambaud)


(Naipablaak iti Bannawag, Marso 13, 2016 a bilang.)

Dap-ayan 2017 ti GF, mapagsasaritaan

Ti Dap-ayan 2017 ti kangrunaan a mapagsasaritan iti maikawalo a regular a board meeting ti GUMIL Filipinas (GUMIL), ti gunglo dagiti mannurat nga Ilokano, iti daytoy Marso 12, 2017.

Maangay ti board meeting iti Union Christian College, City of San Fernando, La Union, iti panangsangaili ti GUMIL La Union nga idauluan ni Eddy Almodovar, kas impakaammo ni Arthur P. Urata, Sr., presidente ti GUMIL.

Sangailien met ti GUMIL La Union ti Dap-ayan 2017: Maika-49 a Nailian a Kombension ti GUMIL Filipinas ken Komperensia iti Lengguahe ken Literatura nga Ilokano inton Abril 21-23, 2016 iti nadakamat a kolehio.

Malaksid kadagiti opisial ken mammagbaga, manamnama ti yaatendar dagiti presidente dagiti GUMIL chapters iti nasao a miting.

Para iti idadar-ay iti miting ken para iti pre-registration iti Dap-ayan 2017, makiuman ken ni GUMIL La Union Secretary Teofilo Damoco (0939 968 7836). (NME Valdez)


(Naipablaak iti Bannawag, Marso 13, 2017 a bilang.)

Salip iti Daniw a Para Ubbing ti Ilagan Association of Hong Kong

Linuktan itay nabiit ti Ilagan Association of Hong Kong nga idaluan ni Virginia C. Arquero ti pasalipna iti panagsurat iti daniw a para ubbing babaen ti tulong ti Mariano Marcos State University-College of Teacher Education babaen ti dekana daytoy a ni Dr. Eliza T. Samson ken ti GUMIL MMSU-CTE a pagpaayan ni Dr. Edna C. Nagtalon a mammagbaga. Agpaay met ni Elizabeth M. Raquel, dati nga NCCA Coordinator for Northern Luzon, a pangulo ti Secretariat.

Dagiti Pagannurotan:

1. Dagiti laeng estudiante iti kolehio/unibersidad ti mapalubosan a makisalip.

2. Maysa a daniw laeng a para ubbing (children’s poetry) ti idatag ti tunggal makisalip. Masurat ti daniw iti Ilokano, buklen daytoy ti uppat nga stanza a ti tunggal stanza, buklen met ti uppat a linia.

3. Awan ti nagan ti autor (pudno man wenno parbo a nagan) nga agparang iti pakisalip a daniw.

4. Nasken a bukod a putar ti mannaniw ti pakisalipna. Nasken pay a di pay naipablaak ken saan a naipatarus manipud iti sabali a lengguahe ti isalip a daniw. No matakuatan a nasalungasing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Ilagan Association of Hong Kong.

5. Deadline ti panagidatag: Abril 8, 2017. Ipatulod babaen ti e-mail ti pakisalip iti elimraquel@yahoo.com iti subject a “Salip iti Daniw a Para Ubbing Ilagan Assn of HK.”

6. Dua a file ti y-email. Umuna, ti daniw. Maikadua, ti file a yan ti paulo ti daniw, kompleto a nagan ti autor, numero ti selpon, kolehio/unibersidad a pagbasbasaan, adres iti pagtaengan, ababa a pakasaritaan ti biag, ken retrato.

7. Dagiti premio: 1st Prize: Php3,000; 2nd Prize: Php 2,500; 3rd Prize: Php2,000.00.

8. Mapadayawan dagiti mangabak inton Abril 29, 2017 iti Mariano Marcos State University-College of Teacher Education.

9. Makipagtagikua ti Ilagan Association of Hong Kong kadagiti mangabak a daniw ket awan sungsungbatanna kadagiti mannaniw no bilang usarenna dagitoy iti ania man a wagas kas iti pannakaipabuya, pannakaipablaak iti magasin wenno libro, ken pannaipaskil iti social media. Agtalinaed ketdi ti copyright iti autor wenno mannaniw.


(Naipablaak iti Bannawag, Marso 13, 2017 a bilang.)

MARSO 13, 2017

SARITA
4 Ti “Change Is Coming” iti Biag ni Poldo
    Hilario A. Espiritu, Jr.
12 Pakpakauna ti Masakbayan
     Placido R. Real

NOBELA
8 Oplan Maharlika (9)
     Norberto D. Bumanglag, Jr.
10 Kalinawa (11)
      Linda T. Lingbaoan

DANIW
6 Panagarem iti Maysa a Sabong
    Mikael R. Gallego
22 Buya iti Maikatlo a Kadsaaran ti Lirio ti Tanap
      Alegria Tan Visaya
47 Daniw a Para Ubbing
     Anna Liza Madayag Gaspar

SALAYSAY
16 “Manang Biday,” Sibibiag Idiay Australia
     Eden C. Bulong
26 Ay, Kapas!
     Reynaldo E. Andres

KOMIKS
35 Sweet Jazmine (26)
38 Don Clavio de Ylocos (28)
41 Miks & Tiks

KOLUM
15 Kastoy, Kapid, Ditoy Hawaii
17 Saludsodem ken ni Apo Hues
19 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
14 Biag ni Ilokano
20 Siled ti Kararag
21 Panangpasayaat iti Relasion ti Aso ken ti Amo Daytoy
29 Idi Un-unana a Panawen
32 Ammuem Pay Dagitoy
33 Haytek!
34 Panangdalus iti Tabla a Suelo
43 Ti Gasatmo Ita a Lawas
46 Dagiti Pabula ni Aesop