Ubog ti Anibong

UBOG TI ANIBONG. Maysa a klase ti mula ti anibong a kapamilia ti palmera, ti ubog daytoy, maiw-iwa wenno masigitsigit ket naimas a mailaok iti lauya a baboy ta ti ubog ti mangpasam-it iti digona. Alisto pay a pagpalukneng iti karne. Mabalin met nga ilaok iti dinengdeng. Adu ti kakastoy a lako iti tiendaan ti Pudtol, Apayao, agbalor iti beinte pisos ti maysa nga ubog. Nayabay met iti kanawan (nakukuttong) dagiti ubog ti way. (Aileen R. Rambaud)


(Naipablaak iti Bannawag, Marso 16, 2015 a bilang.)

KWF, agawat iti pakisalip iti Timpalak Uswag Darepdep agingga iti Abril 1

Agingga iti Abril 1, 2015 ti maudi nga aldaw iti panagidatag iti pakisalip iti Timpalak Uswag Darepdep ti Komisyon sa Wikang Filipino (KWF). Silulukat ti salip kadagiti amin nga agtutubo nga agedad 12-17 nga agsursurat iti nadumaduma a lengguahe iti Filipinas.

Para iti umuna a tawen (2014-2015), nabingbingay ti salip kadagiti kategoria iti ababa a sarita ken daniw kadagiti sumaganad a lengguahe: Ilokano, Bikol, Sebwano, ken Mëranaw. Saan nga ab-ababa ngem sangapulo a panid ti idatag iti kategoria nga ababa a sarita. Iti met kategoria a daniw, masapul a buklen ti di nababbaba ngem sangapulo (10) a daniw ken saan nga ad-adu ngem sangapulo ket lima (15) a daniw. Mabalin a mangidatag ti tunggal mannurat iti saggaysa nga entry iti tunggal kategoria.
Maysa a wagas ti KWF ti Timpalak Uswag Darepdep a mangpadur-as kadagiti nakayanakan a lengguahe iti pagilian nga ad-adda pay a mangpadur-as met iti lengguahe a Filipino.

Umawat dagiti mangabak iti tunggal rehion iti medalia manipud iti KWF ken iti premio a kuarta, kas sumaganad: P10,000, Umuna a Gunggona; P5,000, Maika-2 a Gunggona; ken P3,000, Maika-3 a Gunggona.

Para iti dadduma pay nga impormasion maipanggep iti pasalip, bisitaen ti Facebook page ti KWF wenno ti www.kwf.gov.ph.


(Naipablaak iti Bannawag, Marso 16, 2015 a bilang.)

Nobela nga Ilokano, mataming iti “Tungtongan 4” ti GMM

Maipanggep iti panagsurat ken kasasaad dagiti nobela nga Ilokano ti mapagsasaritaan iti “Tungtongan 4,” ti serye ti lektiur nga ang-angayen ti GUMIL Metro Manila (ti gunglo dagiti mannurat nga Ilokano iti Kamanilaan).

Maangay inton Marso 22, 2015, 8A.M.-1P.M. (saan a Marso 21, 2015, 1-5 P.M., kas immuna a naipakaammo) iti Old Balara, Quezon City, aglektiur da Linda T. Lingbaoan-Bulong ken Sherma E. Benosa, agpada a grantee iti National Book Development Board 2013 Trust Fund para iti nobela iti Ilokano, ken nobelista iti Bannawag Neyo Mario E. Valdez.

Silulukat daytoy iti publiko nupay masapul nga ipakaammo sakbayna ken ni Ariel S. Tabag, presidente ti GMM, iti 0921 602 1938.

Mapagsasaritaanto pay iti “Tungtongan 4” ti panagsagana ti GMM iti panangsangailina iti Dap-ayan 2015, ti maika-47 a nailian a kombension ti GUMIL Filipinas, a maangay inton Abril 17-19 iti Cubao, Quezon City. (M.C. Rasing)

(Naipablaak iti Bannawag, Marso 16, 2015 a bilang.)

Miting ti GUMIL Pangasinan: Marso 15

Angayen ti GUMIL Pangasinan ti miting ti gunglo itoy a Marso 15, 10 A.M., iti pagtaengan da agkaingungot a GP President Fernando B. Sanchez ken Benny Sanchez iti Burgos St., San Nicolas, Pangasinan.

Mapagsasaritaan ti yaatendar ti gunglo iti maika-47 a kombension ti GUMIL Filipinas a maangay iti Quezon City inton Abril 17-19.

Para iti dadduma pay nga impormasion, kontaken ni F.B. Sanchez iti 0999-907-2603.

Libro ti dandaniw ni National Artist Cirilo Bautista, mayalnag

Mayalnag ti libro ti dandaniw ni National Artist for Literature Cirilo F. Bautista iti daytoy Marso 12, 2015 iti De La Salle University (DLSU), Taft Avenue, Manila.

Napauluan iti “Things Happen,” buklen daytoy dagiti kaudian a dandaniw iti Ingles ni NA Bautista ken impablaak ti University of Santo Tomas Publishing House.

Naikeddeng a National Artist itay napan a tawen, mapadayawan pay iti nasao nga okasion ni Bautista babaen ti pannakayalnag ti Cirilo F. Bautista Program for the Literary Arts ti nasao nga unibersidad a pagpapaayan ni Bautista a Professor Emeritus ken University Fellow.

“Booklatan sa Bayan” ti NBDB, sangailien ti GIN ken DepEd Laoag City

Sangailien ti GUMIL Ilocos Norte iti pannakitinnulong ti Department of Education iti Division of Laoag City ti “Booklatan sa Bayan” a programa ti National Book Development Board (NBDB), iti daytoy a Marso 13-14, 2015 iti DepEd- Laoag City Division Office Conference Hall, Laoag City.

Babaen ti tema a “Librotayo nga Umili, Daton iti Ili” ken dar-ayan dagiti titser, mannurat, estudiante ken librarian, mapagsasaritaan iti nasao a seminar-workhop ti panagsurat, panagipablaak, ken panangipateg kadagiti libro ket manamnama a maipasagepsep ti kababalin a kinamanagbasa.

Karaman kadagiti aglektiur da NBDB Executive Director Graciela Mendoza-Cayton, Zarah Gagatiga, Alvin Buenaventura ti Filcols, Adam David ti BLTX, nobelista Joel B. Manuel ti Banna National High School, ken Bannawag Poetry Editor Ariel S. Tabag.

Mangrugi ti lecture-workshop iti alas nuebe iti bigat ti Marso 13.

Para kadagiti interesado a dumar-ay, kauman ni GIN President ken NCCA Coordinator for Northern Luzon Elizabeth M. Raquel iti 0999 992 7179.


(Naipablaak iti Bannawag, Marso 16, 2015 a bilang.)

MARSO 16, 2015

SARITA
6 Ti Dangadang ni Lampi Tao
    Ronnie E. Aguinaldo

NOBELA
12 Operation: Drop Venus (4)
     Norberto D. Bumanglag, Jr.
16 Siak ni Precious (1)
     Juan Al. Asuncion

DANIW
9 Iti Itatapawko iti Bantay Mui Wo
    Rosalie A. Barnachea
47 Dandaniw a Para Ubbing
     Charmaine Joy P. Sebastian/ Delfin P. Dumayas

SALAYSAY
10 Ti Sakit a Mangtakaw iti Kinaasino
      Virginia A. Duldulao, Ph.D.
20 Am-ammoyo Pay Met Laeng Daydi Presidente Magsaysay?
      Gregorio T. Amano
40 Agmula iti Kardis Ita a Kalgaw
     Reynaldo E. Andres

KOMIKS
27 Gayang ni Lam-ang (76)
30 Aritosan (126)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Haytek
26 Apong
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Dimo Maaw-awatan ti Tarakenmo a Baboy?
24 “Foundation Tree,” Naimula iti NLPSC
34 Ammuem Pay Dagitoy
37 Agkurkurangka iti Oras?
38 Dika Agik-ikkis, Dika Agbugbugkaw
39 Mokusaku: Ti Suka Manipud iti Kayo
45 Ti Gasatmo Ita a Lawas
46 Idi Un-unana a Panawen