Igat Para Kadagiti Debosionado

IGAT PARA KADAGITI DEBOSIONADO. Ikankannawag daytoy naanus a misis ti lakona nga igat kadagiti aglabas a debosionado ken ni Santa Clara a mapan makimisa iti kapilia ti Poor Clare Monastery iti Bayo, Iguig, Cagayan, iti maysa a bigat ti Domingo. Nakalapan ti igat kasta met dagiti lakona pay nga attasi (dalag) iti Karayan Cagayan iti asideg. Kadawyan a tunggal aldaw ti misa iti nasao a monasterio dagiti mongha, agdadapon met dagiti aglaklako iti nadumaduma a nateng ken lames iti sungadan ti dalan nga agturong iti nalmeng a monasterio. (Roy V. Aragon)


(Naipablaak iti Bannawag, Oktubre 14, 2013 a bilang.)

Generic nga agas, talken dagiti Filipino

Umad-adu dagiti Filipino nga agtalek kadagiti generic nga agas, kas impakaammo ti Department of Health (DoH).

Impakaammo ni Health Secretary Enrique Ona daytoy iti panagsaritana iti 2013 Generics Summit iti main office ti DoH iti Manila itay lawasna.

Naangay ti pasken a kas panglagip iti maika-25 nga anibersario ti pannakaipakat ti Generics Drug Act of 1988, a kas kinuna ni Ona, maysa kadagiti kapapatgan a pagteng iti health system ti pagilian.

Kinuna ni Ona a ti nasao a linteg ti nangital-o iti panagkasapulan kadagiti generic nga agas, a sakbayna, maibagbaga dagitoy a substandard wenno nababa ti klaseda a maidilig kadagiti kapadada a branded nga agas.

Babaen pay ti linteg, naipaayan dagiti umili kadagiti nalaklaka nga agas a kas met laeng iti kasamay dagiti branded nga agas.

Makuna a “generic” dagiti agas a mailaklako nga awan naganda wenno di mayan-anunsio a maikagapu met iti nalaklaka a presio dagitoy ngem kadagiti nalatak nga agas.

Innayon ni Ona a maibatay iti 2011 Assessment of Cheaper Medicine Act of 2008, mapan a 55 a porsiento iti populasion ti Filipinas ti agus-usaren kadagiti generic nga agas.

(Naipablaak iti Bannawag, Oktubre 14, 2013 a bilang.)

Holy water, mabalin a napeggad

Imbes a nasantuan ti danum a maus-usar kadagiti pagbenditaan kadagiti simbaan ken kapilia nangruna kadagiti ospital, nagimet iti 62 milion a bakteria ti tunggal milliliter dagiti benditado a danum (holy water), segun iti panagadal ti Institute of Hygiene and Applied Immunology iti MedUni iti Vienna.

Uray dagiti “nasantuan nga ubbog” iti Austria, natakuatan met nga addaan iti nitrate ken rugit ti ayup ket ngarud, saan a mabalin nga inumen.

Segun iti report, inamiris dagiti microbiologist ti kalidad ti danum ti aganay a 21 a “nasantuan” nga ubbog, kasta met ti 18 a pagbenditaan kadagiti simbaan ken kapilia iti ospital iti Vienna iti agduduam a tiempo ti tawen.

Mapan a 14% porsiento laeng ti nakapasa kadagiti rekisito a mikrobiolohikal ken kemikal iti nailian a regulasion iti mainum a danum— a mabalin a resulta ti saan a kinamanagdaldalus.

Saan laeng a nagimet dagiti ubbog kadagiti rugit ti ayup nga addaan iti E. coli bacteria ken enterococci, no di pay ket iti campylobacter, a mabalin a pakaigapuan ti panagtakki.

Awan pay panagadal a nayusuat kadagiti pagbenditaan kadagiti simbaan iti Filipinas no ti kinarugitda ket kas iti kinarugit dagiti nadakamat a pagbenditaan iti Austria ngem kuna dagiti autoridad nga awan kas iti agannad.

(Naipablaak iti Bannawag, Oktubre 14, 2013 a bilang.)

Sangsangkamaysa Dagiti Ilokano

SANGSANGKAMAYSA DAGITI ILOKANO nga indauluan dagiti nadumaduma a sekta ti relihion a kas iti Romano Katoliko, Iglesia Filipina Independiente, United Church of Christ of the Philippines, ken dagiti mannalon, agad-adal ken grupo ti babbai a kas iti Gabriela a nangkondenar iti naalas a pannakaaramat ti pork barrel babaen dagiti agtuturay. Idi laeng Sabado, Septiembre 28, naiwayat ti maysa a prayer rally iti sango ti Lourdes Grotto iti St. William Cathedral iti Siudad ti Laoag tapno ipeksada ti pannakaikkat koman a maminpinsan ti pork barrel manipud iti Presidente agingga iti Barangay a patienda a maysa laeng a simtoma ti nakana a sakit a panagkunniber iti gobierno a kasapulan a mareporma. Indariragda pay ti pannakapalutpot ken pannakadusa ti asino man nga adda iti likudan ti nasao a pork barrel scandal tapno mapasubli ti panagtalek dagiti umili iti gobierno. (Leilanie G. Adriano)


(Naipablaak iti Bannawag, Oktubre 14, 2013 a bilang.)

OKTUBRE 14, 2013

SARITA
 6 Ti Biahe
     Noli S. Dumlao

NOBELA
26 Kasera 101 (12)
    N.M.E. Valdez
32 Galiera Queen (32)
   Dionisio S. Bulong

DANIW
4 2 a Daniw iti Panangdilpat iti Bukod a Sugat
   Roy V. Aragon
8 Mangipangpangta Dagiti Malem Ditoy Puro
      Ronnie E. Aguinaldo
48 Dandaniw a Para Ubbing
     Gladys S. Reyes/ Shella B. Cacatian

SALAYSAY
10 Ti Idolok a Prinsipal
     Rosario A. Bingayen
12 Saan a Filipino?
     Neyo Mario E. Valdez
40 Umno a Wagas ti Panagbuno iti Mula a Sandia
     Reynaldo E. Andres

KOMIKS
19 Gayang ni Lam-ang (2)
22 Aritosan (48)
24 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Concecutive Champion, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
17 Siled ti Kararag
18 Apay, Anakko, Saanka Met a Dati a Kastoy?
29 Nariribuk Dagiti Ubbing iti Klasem, Ma’am?
31 Wen, Ta Saan nga Impormasion Laeng ti Nasken
33 Txtm8
35 Ti Gasatmo Ita a Lawas
36 Ammuem Pay Dagitoy
39 Ti Pagadalan ken ti Problema iti Droga ken Alkohol

Eleksion ti SK, saan a maangay itoy nga Oktubre

Saan a maangay ti eleksion ti Sangguniang Kabataan (SK) nga immune a naituding a maangay inton Oktubre 28 itoy a tawen. Ketdi, maangay daytoy iti di naladladaw ngem iti Pebrero 23, 2015.

Nayalud-od ti pannakangay ti eleksion ti SK kalpasan ti panangaprobar itay lawasna ti Senado ken ti Kamara iti report ti bicameral committee a pannakayalud-od ti nasao nga eleksion.

Segun pay iti napagsasaritaan, awan kadagiti agdama nga opisial ti SK ti mapalubosan a mangituloy iti panagtakemda apaman nga agpaso ti panagtakemda. Kayatna a sawen nga awan ti agtakem nga opisial ti SK agingga nga adda mabutosan a baro nga opisial ti SK iti eleksion a maangay iti nagbaetan ti Oktubre 28, 2014 ken Pebrero 23, 2015.

Kuna dagiti kameng ti bicameral committee nga awan ti panggepda a mangwara iti SK no di ket kayatda a mareporma ti SK gapu ta sumagmamanon kadagiti kamengna ti nagbalin metten a gagangay a politiko malaksid a sinerreken ti korupsion ti estruktura ti gunglo.


(Naipablaak iti Bannawag, Oktubre 7, 2013 a bilang.)

“Ikabassityo ti telenobela, yad-aduyo ti agrosario”

Kidkiddawen ti maysa nga Obispo ti Simbaan Katolika nga ibasbassit koma dagiti Katoliko ti orasda iti panagbuyada iti telenobela ket yad-aduda ti panawenda nga agrosario.

Kinuna ni retirado a Novaliches Bishop Teodoro Bacani a no mabalin koma, mangisingay dagiti Katoliko iti 15 a minuto iti oras nga us-usarenda iti panagbuybuyada iti telenobela ket usarenda daytoy nga agrosario.

“Yababayo ti panagbuyayo iti telenobela iti uray 15 a minuto laeng. Usarentayo dayta a 15 a minute a panagrosariotayo iti balbalaytayo,” kinuna ni Bacani iti artikulo nga impostena iti website ti Catholic Bishops’ Conference of the Philippines (CBCP).

Kiniddaw ni Bacani daytoy itay lawasna a kas pangpasungad iti pannakapaliiw ti Holy Rosary Month iti Oktubre.

(Naipablaak iti Bannawag, Oktubre 7, 2013 a bilang.)