Bucaneg Award, maipaay kada Bisquera ken Bumanglag

Bumanglag

Bisquera

Dua a mabigbig a mannurat iti Ilokano, da Norberto D. Bumanglag, Jr. ti San Nicolas, Ilocos Norte ken Ernesto L. Bisquera  (posthumous)  ti Laoac, Pangasinan, ti mapadayawan a kas 2020 Pedro Bucaneg Awardee, kas impakaammo ti Awards Committee ti GUMIL Filipinas.

Ti Pedro Bucaneg Award for Ilokano Literature ti kangatuan a pammadayaw a maipaay ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw) kadagiti agsursurat iti Ilokano a nakaipaay iti naisangsangayan a gapuanan— sinurat ken tignay— iti pannakapadur-as ti Literatura Ilokana.

Mapadayawan ni Bumanglag, retirado a kameng ti US Air Force, “gapu kadagiti adu a gapuananna iti panagsurat iti bukodna a pagsasao kangrunaanna iti panangitag-ayna iti urit ti nobela a makapagagar a nangparsuaanna met iti nalatak nga agbibiag iti lubong ti kurditan – ni John Villa-- a segseggaan dagiti managbasa nga Ilokano dagiti pannakigasanggasatna iti benneg ti panagespia, deteksion, ken seguridad.”

Mapadayawan met ni Bisquera, retirado a mannursuro iti kolehio, “gapu iti nauneg a panangimutektekna iti kinatao ti tao a saan laeng a nangidanon iti agbasbasa iti nalawlawa a panangsaripatpat iti kinaasino ti tao no di pay ket nakatulong iti dakkel iti pannakataginayon ken pannakapadur-as ti nariinganna a literatura ti pulina.”

Pimmusay ni Bisquera, tubo ti Tagudin, Ilocos Sur, idi Septiembre 28 itay napan a tawen.

Yawatto a mismo ti Presidente ti GUMIL Filipinas, ni Remy N. Albano, ken ni Apo Bumanglag ken iti pamilia ni Apo Bisquera ti plake ti pammadayaw ken medalion dagitoy bayat ti pannakaangay ti “Rabii ti Parambak ken Pammadayaw” iti Dap-ayan 2020, wenno ti tinawen a kombension ken literary seminar ti GF, inton Abril 17-19 (nayalud-od gapu iti ECQ iti Luzon gapu iti Covid19) iti National Tobacco Administration (NTA) Building iti Tabug, Siudad ti Batac, Ilocos Norte. (NMEV)


(Naipablaak iti Bannawag iti Abril 1-15, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina!)

INAFES, maipasdek iti Ilocos Norte

Maipasdek iti Ilocos Norte ti Ilocos Norte Agriculture and Fishery Extension System (INAFES) kas maibatay iti katulagan a pinirmaan ti Departamento ti Agrikultura ken ti gobierno probinsial ti Ilocos Norte itay nabiit.

Panggep ti INAFES ti ad-adda pay a pannakapaadda ti umdas a taraon dagiti agindeg iti Ilocos Norte babaen ti pannakaipasdek dagiti pamastrekan dagiti agindeg kadagiti away babaen ti pannakapatan-ay, pannakaadaptar, pannakaibinglay ken pannakaaramat dagiti takuat iti siensia ken inobasion iti panakapasayaat ti wagas ti panagtalon, panagkalap, ken pannakayusuat ti makuna nga agriculture enterprises.

Indauluan da Agriculture Secretary William D. Dar ken Ilocos Norte Governor Matthew Joseph Marcos Manotoc dagiti nagpirma iti MOA idi Pebrero 28 iti Siudad ti Laoag.

Malaksid iti pannakaidanon dagiti serbisio kadagiti away, kinuna pay ni Dar nga addan dagiti programa nga insayangkat ti DA a mangguyugoy kadagiti agtutubo a Filipino a sumrek iti farming ken agri-business.

Mairaman kadagiti nabiit pay a nayusuat a programa ti DA ti Kapital Access for Young Agripreneurs (KAYA) ken Agrinegosyo. Mangidiaya dagitoy nasao a programa iti pautang a mabayadan iti lima a tawen ken awan interesna. (Eliseo B. Contillo)


(Naipablaak iti Bannawag iti Abril 1-15, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina!)