Responsable a panagipadamag, kiddaw ni Secretary Andanar

Kiniddaw ni Presidential Communications Secretary Martin Andanar kadagiti kameng ti media nga agbalinda koma a responsable ken patas iti panagipadamagda ken liklikanda koma dagiti makatikaw a paulo dagiti damag.

Inako ni Andanar, sigud a newsreader iti TV5, nga ammona nga agipabpablaak dagiti media outlet kadagiti makaguyugoy a paulo dagiti damag tapno maawisda ti imatang dagiti agbasbasa; iti kasta makaganarda, ngem ginutigotna dagitoy a siguraduenda koma a nalawag, pudno ken husto dagiti headline nangruna ita a saanen a basbasaen ti kaaduanna nga umili ti sibubukel nga istoria.

Kinuna ni Andanar nga awatentayo ti kinapudno a saanen a basbasaen dagiti tattao ti sibubukel nga istoria; a ti basbasaenda laengen ket dagiti abbaba a headline. Ita, kas responsable nga agiwarwarnak, kinuna ni Andanar, a masapul a makibagay koma met dagiti agiwarwarnak iti kababalin dagiti agbasbasa.

Inako ni Andanar a maladingitan a sumagmamano kadagiti headline ket dida iraman dagiti napapateg nga impormasion ketdi, yaw-awanda ti tao. Kunana a kontra kadagiti ‘bitin’ a headline. Kas pagarigan, no kuna ni Presidente Rodrigo Duterte nga agideklarar iti martial law, masapul a karaman koma ti rason nga isu ti saanen a pannakaatipa ti droga iti pagilian.

Impaganetget ni Andanar a saan a makirirriri kadagiti kameng ti media ngem impalagipna a no naynay dagiti irresponsable a panag-headline, mangparparnuay dagiti agiwarwarnak iti sakit ti nakem ken pannakatikaw kadagiti tattao.

Namallaag pay ni Andanar kadagiti Internet troll a kunana nga agiwarwaras kadagiti propaganda a mangdadael iti administrasion ni Presidente Duterte.


(Naipablaak iti Pebrero 6, 2017 a bilang.)

Bakante a trabaho, kitaen iti PhilJobNet

Binalakadan ni Labor Secretary Silvestre Bello III dagiti agbirbirok iti trabaho a luktanda ti PhilJobNet para kadagiti bakante a posision.

Kuna ni Bello nga iti pay laeng nasao a website, nasurok a 50,000 a bakante a trabaho ti adda iti pagilian nga agur-uray kadagiti agbirbirok iti trabaho.

Maibatay iti report ti Bureau of Local Employment (BLE), ti sangapulo (10) a kaaduan iti bakante iti PhilJobNet ket call center agent (822), staff nurse (402), housekeeper (198), private tutor (180), quality analyst (180), production worker (180), cashier (140), salesperson (135), driver (125), ken accounting officer (100).


(Naipablaak iti Pebrero 6, 2017 a bilang.)

Ferry Boat iti Abra

FERRY BOAT ITI ABRA. Agsagsaganan a dumsaag ken maidissag dagiti pasahero a lugan ken tattao manipud iti ferry boat kalpasan a maballasiwda ti Tumbal River iti Brgy. Madago iti Manabo, Abra. Naggapu dagiti pasahero iti Luba ken Tubo, dua kadagiti kauunegan nga ili ti Abra ken taeng ti tribu a Maeng. Gapu iti kaawan pay laeng ti rangtay iti daytoy a tributario ti Abra River iti nagbedngan ti Manabo ken Luba, ken gapu iti nagsasaruno a bagyo ken layus a nangdadael kadagiti naipatpatakder a hanging wenno foot bridges, ti kastoy a ferry ti usaren dagiti tattao agraman dagiti lugan ken dagiti maibiahe a produkto ken masapsapul. Agplete ti tunggal pasahero iti P40; P75-P150 met ti lugan. (Roy V. Aragon)


(Naipablaak iti Bannawag, Pebrero 6, 2017 a bilang.)

PEBRERO 6, 2017

SARITA
4 Ti Misterio ti Ipapatay ni Tata Kulas
    Hilario A. Espiritu, Jr.
12 Nainget ni Mama
     Arsenio B. Cortez

NOBELA
8 Oplan Maharlika (4)
     Norberto D. Bumanglag, Jr.
10 Kalinawa (6)
      Linda T. Lingbaoan

DANIW
6 Samal
    Arnold C. Baxa
20 Dagiti Turod ti Isabela
     Ria Rebolledo
47 Daniw a Para Ubbing
    Anna Liza Madayag Gaspar

SALAYSAY
22 Iti Hawaii: Adda Met Sunflower Field iti North Shore, Oahu
      Leilanie G. Adriano
26 Padasen Daytoy Baro a Barayti ti Murod
     Reynaldo E. Andres

KOMIKS
35 Sweet Jazmine (21)
38 Don Clavio de Ylocos (23)
41 Miks & Tiks

KOLUM
15 Kastoy, Kapid, Ditoy Hawaii
17 Saludsodem ken ni Apo Hues
19 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
14 Biag ni Ilokano
16 Siled ti Kararag
21 Ipakitam Met ti Tarakenmo a Tumatayab iti Beterinario
29 Idi Un-unana a Panawen
32 Ammuem Pay Dagitoy
33 Haytek!
34 Kasano a Dalusan ti Baldosa?
43 Ti Gasatmo Ita a Lawas
46 Dagiti Pabula ni Aesop

Share The Air!

SHARE THE AIR! Adda iti kanigid ni Filcon Rivera, tubo iti Bayawan, Negros Oriental,  maysa a mangikamkampania iti pannakasalaknib ti nakaparsuaan babaen ti panangus-usarna iti bisikletana a naaramid iti kawayan iti panagbiahena. Kadagiti amin a lugar a madandanonna, ibambando ni Filcon Rivera a masalakniban koma ti aglawlaw ken ti nakaparsuaan babaen ti saan a panagaramat kadagiti naasuk a lugan; iti kasta, mapagtalinaed met a nadalus ti angin. Iti ladawan, siraragsak da Florante Nicolas ti San Nicolas, Ilocos Norte (maikadua iti kanawan) ken ti putotna a ni Simon (nakalabaga) ken da Claudette Hernandez ti Sarrat, I.N. (kakanawanan) ken ti kaanakan daytoy a ni Pio (nakasando)  a nakigrupo ken ni Rivera kas pangipakitada iti suportada kenkuana. (Leilanie G. Adriano)


(Naipablaak iti Bannawag, Enero 30, 2017 a bilang.)

Pondo a para kadagiti sinurat a mainaig iti I.N., nakasagana

Mangrugin nga agawat ti gobierno probinsial ti Ilocos Norte kadagiti manuskrito wenno project proposal a mainaig iti nabaknang a pakasaritaan ken kultura ti Ilocos Norte a mabalin a ponduan ti gobierno iti babaen ti administrasion ni Gobernador Imee Marcos.

Kas kuna ti Communications and Media Office nga idauluan ni Jun Arvin Gudoy, nakasaganan ti bicentennial council nga agarisit kadagiti maidatag a proposal a mabalin nga ilibro ken maipablaak inton madanon ti maika-200 a panagkasangay ti Ilocos Norte iti 2018.

Mairaman iti daytoy a proyekto dagiti graphic novel, dagiti sarita a para kadagiti ubbing, daniw, kanta, panagsukisok maipanggep iti kultura ken kannawidan, bannuar iti Kailokuan, agrikultura, arkitektura ken dadduma pay a pakaseknan ni Ilokano.

Maipablaak amin a mapili a sinurat ken mayalnagto iti di naladladaw ngem iti Pebrero 2018 a kas paset iti bicentennial celebration ti Ilocos Norte.

Para iti ad-adu pay nga impormasion, maawis dagiti agngayangay a mannurat a makiuman wenno agisubmitir  iti gapuananda iti Ilocos Norte Provincial Capitol-Communications and Media Office wenno ag-e-mail iti ilocosnorte.mediabureau@gmail.com.


(Naipablaak iti Bannawag, Enero 30, 2017 a bilang.)

65,000 a titser ken staff, kasapulan ti DepEd

Kasapulan ti Department of Education (DepEd) ti nasursurok ngem 65,000 a titser ken personnel a para kadagiti eskuela publika iti entero a pagilian tapno masigurado ti naannayas a pannakaipatungpal ti K to 12 program iti daytoy a tawen.

Iti pannakairugi ti Grade 12 iti daytoy Hunio, kuna ni DepEd Secretary Leonor Briones a papigsaen ti panagnayon iti tao ti nasao a programa, nangruna ket nanayonan iti 12 a porsiento ti badyet ti departamento iti daytoy a tawen.

Immun-unan nga impakaammo ti Department of Budget and Management (DBM) nga umawat ti DepEd iti kadakkelan nga alokasion kadagiti amin departamento iti ehekutibo itoy a tawen nga agdagup iti 543.2-bilion a pisos.

Kuna ti DBM a ti panagkurkurang iti titser ken personnel ti makitkita a kas maysa kadagiti kangrunaan a rason iti panagbaba ti kalidad ti edukasion iti Filipinas kadagiti rinibu a para publiko nga eskuela iti elementaria ken hayskul.

Kinarit ni Secretary Briones dagiti titser a tulonganda dagiti estudiante a mangtakuat kadagiti baro ken makapagagar a dana; maam-ammo ken ad-adda nga ayatenda ti pagilianda; madiskobre dagiti bambanag a dida ammo sakbayna; masursuruan kadagiti ‘skill’ a pagkamtudanda; agbalin a nasaysayaat a tattao ken umili iti pagilian ken iti lubong.


(Naipablaak iti Bannawag, Enero 30, 2017 a bilang.)

ENERO 30, 2017

SARITA
4 Maysa a Rabii a Naslag ‘Diay Bulan
   Hilario A. Espiritu, Jr.
12 Bay-am Ta Aglailo
    Fredelito L. Lazo

NOBELA
8 Oplan Maharlika (3)
     Norberto D. Bumanglag, Jr.
10 Kalinawa (5)
      Linda T. Lingbaoan

DANIW
6 Kinaawan Sierto
    Ariel S. Tabag
22 Iti Panagkita ti Sabali
     Remy N. Albano
47 Daniw a Para Ubbing
      Teresita M. De Ocampo

SALAYSAY
14 Kayatmo Met ti Agpabatek?
     Virginia A. Duldulao, Ph.D.
26 Padasen ti Kombinasion a Pagay-Itik
     Reynaldo E. Andres

KOMIKS
35 Sweet Jazmine (20)
38 Don Clavio de Ylocos (22)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Siled ti Kararag
23 Taraken a Koneho: Suruam a Saan a ti La Adda a Pagrugitanna
29 Idi Un-unana a Panawen
32 Ammuem Pay Dagitoy
33 Haytek!
34 Panangplano iti Idasar Tapno Makainut iti Gastos
43 Ti Gasatmo Ita a Lawas
46 Dagiti Pabula ni Aesop

Sabali Manen a 13 a Kabarbaro a Yunit ti Ambulansia

SABALI MANEN A 13 A KABARBARO A YUNIT TI AMBULANSIA ti naipaay kadagiti gobierno lokal ken ospital iti Amianan a Luzon babaen ti Philippine Charity Sweepstakes Office (PCSO) nga idauluan ni Chairman Jose Jorge Corpuz (naka-stripe). Itay laeng Enero 6, 2017, naipaay ti saggaysa nga ambulansia kadagiti ili ti Ilocos Norte a Dingras, Bangui, Pagudpud, Sarrat, ken ti Provincial Disaster Risk Reduction and Management Council ti kapitolio ti nasao a probinsia, ken ti Mariano Marcos Memorial Hospital and Medical Center iti Siudad ti Batac. Immawat met iti saggaysa nga ambulansia dagiti munisipio iti Ilocos Sur a Sigay, Santiago, ken San Emilio ken dagiti district hospital iti Sinait ken Magsingal, malaksid iti saggaysa nga ambulansia ti inawat dagiti ili iti Abra a Tubo ken Sallapadan. Maibatay iti PCSO Charter, adda mailatang nga P6.00 a para iti charity iti tunggal P20.00 a magastos dagiti agay-ayam iti lotto wenno ania man a paay-ayam ti PCSO. Maurnong daytoy a kantidad sa maigatang kadagiti nadumaduma a ramit iti ospital a kas iti ambulansia ken dadduma pay a kasapulan a para iti salun-at. (Leilanie G. Adriano)


(Naipablaak iti Bannawag, Enero 23, 2017

Matiliw dagiti agpapautang babaen ti “5-6”

Imbilin itay nabiit ni Presidente Rodrigo Duterte a matiliw ken maideportar dagiti ganggannaet a mangiwaywayat iti “5-6” a kunana a maysa a klase ti nakaro a panagpautang.

Kinuna ni Duterte ti sobra a panagpautang ti managan iti “5-6” nangruna no malakuan pay dagiti immutang iti nangina nga aplayanses. Iti kastoy a klase ti panagpautang, kunana a saan a pulos a makalung-aw dagiti marigrigat.

Mainaig itoy, binilin ti Presidente ni Foreign Affairs Secretary Perfecto Yasay Jr. a pakaammuanna ni Indian Ambassador iti Filipinas maipapan iti desisionna a mangpasardeng iti “5-6.” Kaaduanna ngamin a dagiti Bombay ti mangiwaywayat iti kastoy a panagpautang.

Kuna ni Duterte nga aglablabsing dagitoy a Bombay kadagiti paglintegan iti Filipinas babaen ti panagnegosioda iti mainaig iti kuarta nga awananda met iti maitutop a permit.

Kuna met ni Agriculture Secretary Manny Piñol a mapan a 50,000 dagiti nakamotor nga agpapautang iti pagilian. No makautang ‘tay tao iti P5,000, mapuersa daytoy nga agbayad iti P1,000 nga interes wenno anak iti makabulan a masingir iti inaldaw. Ti makautang iti P1,000 iti babaen ti “5-6,” masapul nga agbayad iti P30 iti 40 nga aldaw wenno iti dagup a P1,200.

Kuna ni Piñol a ti nangato nga interes, imbes a palag-anenna ti biag dagiti nakautang, ad-adda ketdi nga ilumlomna ida iti rigat.

Kuna ni Justice Secretary Vitaliano Aguirre a mabalin a matiliw dagiti agpapa-“5-6” nga uray awan ti mandamiento de aresto no awanan dagitoy iti permit nga agnegosio ken dadduma pay a rekisito manipud iti gobierno.


(Naipablaak iti Bannawag, Enero 23, 2017 a bilang.)

Pension iti SSS, nanayonan iti P1,000

Sabali pay a P1,000 inton 2022

Inaprobaran ni Presidente Rodrigo Duterte ti P1,000 a nayon ti pension iti Social Security System (SSS) itay Enero 10, 2017, kas resulta ti naiwayat a miting iti Malakanyang itay Enero 9.

Kuna ni SSS Chairman Amado Valdez a mayimplementar ti umuna a P1,000 a nayon iti pension iti daytoy a bulan sa mapasarunuan iti sabali pay a P1,000 inton 2022 wenno mabalin a nasapsapa no napintas ti resulta dagiti iwayatda nga addang a mangparang-ay iti ahensia.

Impanamnama met ni SSS President Emmanuel Dooc nga addaan ti SSS iti umdas a pondo a para iti nasao a pannakaingato ti pension.

Karaman kadagiti iwayat ti ahensia nga addang para iti pannakapaadda ti umdas a pondo ti pannakaidarum dagiti delingkuente nga employer a mangsalsalungasing kadagiti pagalagadan ti SSS ken ti pannakaisardeng dagiti sobra a bonus dagiti opisial ti SSS.


(Naipablaak iti Bannawag, Enero 23, 2017 a bilang.)

ENERO 23, 2017

SARITA
12 Dagiti Umallawat a Dakulap
     Abraham Pasion
14 Alfredo
     Manuel S. Diaz

NOBELA
8 Oplan Maharlika (2)
     Norberto D. Bumanglag, Jr.
10 Kalinawa (4)
      Linda T. Lingbaoan

DANIW
6 Demmang
    Roy V. Aragon
47 Daniw a Para Ubbing
     Edna C. Nagtalon

SALAYSAY
4 Intayon Aguli iti Bantay
     Bonifacio V. Ramos
26 Isapsapa ti Agmula iti Tabungaw
     Reynaldo E. Andres

KOMIKS
35 Sweet Jazmine (19)
38 Don Clavio de Ylocos (21)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Siled ti Kararag
22 Masapul nga Ammo da Tatang ken Nanang
23 Taraken a Kalding iti Uneg ti Balay?
29 Idi Un-unana a Panawen
32 Ammuem Pay Dagitoy
33 Haytek!
34 Panangaywan Kadagiti Nataengan
43 Ti Gasatmo Ita a Lawas
46 Dagiti Pabula ni Aesop

Maysa nga Ilokana

MAYSA NGA ILOKANA A KATULONGAN ITI HONG KONG ti aglatlatak ita kadagiti kaprobinsiaanna iti Ilocos Norte kalpasan a napili a nagakem a kas maysa kadagiti kangrunana nga agakem iti "Sunday Beauty Queen," ti kaunaan a documentary film a napili a naipabuya iti Metro Manila Film Festival. Maysa a single mom ni Hazel Perdido; addaan iti tallo a lallaki nga annak. Agtawen iti 33 ken tubo iti Barangay Pambaran, Paoay. Saanna a ninamnama a babaen ti pannakipartisiparna iti maysa a pageant iti Hong Kong, ditoy met a nadiskobre ni Direk Baby Ruth Villar. Naibatay ti “Sunday Beauty Queen” iti pakasaritaan ti biag ni Hazel ken nakapilian ti nasao a pelikula a Best Picture. Nupay nagturpos iti Computer Science iti Mariano Marcos State University, pinili ni Hazel ti nagpaay a katulongan iti Hong Kong tapno mapagbasana dagiti tallo nga annakna. “Sapay koma ta buyaen dagiti annak dagiti OFW ti SBQ tapno maawatanda ti kasasaadmi nga OFW,” kinuna ni Hazel.  (Leilanie G. Adriano)


(Naipablaak iti Bannawag, Enero 16, 2017 a bilang.)

PWDs, ammuenda koma dagiti nayon a benepisio a maited kadakuada -- DSWD

Rumbeng koma a siaammo dagiti persons with disabilities (PWDs) kadagiti nayon a benepisio ken pribilehio a karbenganda a maawat, kas sagudayen ti Akta Republika 10754.

Inlawlawag ni Secretary Judy Taguiwalo ti Department of Social Welfare and Development (DSWD) a saanen a nasken ti nayon a guidelines manipud kadagiti implementing agencies ta umdasen ti linteg ken ti implementing rules and regulations (IRR) a mangipaay iti nayon a diskuento dagiti PWDs.

Pinirmaan ti DSWD, Department of Health, ken ti National Council on Disability Affairs idi Disiembre 23, 2016 ti IRR ti RA 10754 nga am-ammo pay a kas An Act Expanding the Benefits and Privileges of Persons with Disability.

Sagudayen ti linteg a mailibre dagiti PWDs iti value-added tax (VAT) para kadagiti naituding a produkto ken serbisio manipud kadagiti amin nga establisimiento. Sabali laeng ti 20 porsiento a diskuentoda nga ipapaay kadakuada dagiti agdaman a linteg.

Sakupen ti libre a VAT ken diskuento dagiti produkto/serbisio dagiti restaurant, recreation centers, pagsinean ken concert halls, ken dagiti lodging establishments.

Mairaman pay ditoy dagiti gatangen nga agas, serbisio medikal ken dental, agraman dagiti laboratory ken professional fees dagiti doktor, plete iti bus, eroplano ken bapor ken kapadana a lugan iti uneg ti pagilian, ken serbisio iti puneraria ken pannakaipumpon.

Karaman pay kadagiti serbisio a maited kadagiti PWDs ti social insurance babaen ti Government Service Insurance System, Social Security System, Pag-IBIG, ken educational assistance.

Iti panangawat dagiti PWDs kadagiti a benepisio, nasken a mangipakitada iti pammaneknek a karbenganda ti maipaayan kadagitoy a benepisio, kas koma iti ID nga it-ited ti opisina DSWD kadagiti PWDs.


(Naipablaak iti Bannawag, Enero 16, 2017 a bilang.)

ENERO 16, 2017

SARITA
12 Iti Panagpitik Dagiti Darikmat
    Rizalina M. Pasaraba
14 Ti Ayat Ti Maysa Nga Ubing… Ti Ayat Ti Maysa A Lakay…
     Dionisio S. Bulong

NOBELA
8 Oplan Maharlika (1)
     Norberto D. Bumanglag, Jr.
10 Kalinawa (3)
      Linda T. Lingbaoan

DANIW
6 Kunam, Agtungtongta Manen
   Romel A. Pascua
20 Apo Lakay
    Johmar R. Alvarez
47 Daniw a Para Ubbing
     Diana Mei P. Galang ken Jennyvebs Urbano


SALAYSAY
4 Makaengganio ti Cape Engaño
     Roselyn C. Campano
26 Itiempom ti Agmula iti Pallang
     Reynaldo E. Andres

KOMIKS
35 Sweet Jazmine (18)
38 Don Clavio de Ylocos (20)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
18 Siled ti Kararag
22 Takuatem ti Kapardasan a Panangagsepmo iti Adal
23 Kayatmo ti Agtaraken iti Koneho?
29 Idi Un-unana a Panawen
32 Ammuem Pay Dagitoy
33 Haytek!
34 No Agdadamoka nga Agtagibalay
43 Ti Gasatmo Ita a Lawas
46 Dagiti Pabula ni Aesop

"Adda Uram Ditoy, Apo!"

“ADDA URAM DITOY, APO!” Tapno al-alisto ti itutulong dagiti maseknan nga ahensia ti gobierno no adda mapasamak a desgrasia, uram ken dadduma pay, nabukel itay nabiit ti 911 Provincial Incidence Response Management (PIRM) babaen ti panangidaulo ni Gob. Ma. Imelda Josefa “Imee" Marcos. Kas met laeng iti 911 emergency hotline ti gobierno national, nakalukat ti PIRM, a nakabase iti ground floor ti kapitolio, iti 24/7 (aldaw ken rabii). Kadagiti agkasapulan iti tulong, tawagan laeng ti ania man kadagiti sumaganad a numero: (Landline) 077 600 0948/ 077 772 1772; (Smart) 0999 999 7707; ken Globe (0917 109 9911). (Leilanie G. Adriano)


(Naipablaak iti Bannawag, Enero 9, 2017 a bilang.)

Abusado nga employer, sipsiputan ti Dept. of Labor

Agalada iti ag-OJT tapno makainutda?

Kas sunot ti immiget a kampaniana kontra iti kontraktualisasion itay napan a tawen, sirsirigen met ti Department of Labor and Employment (DoLE) iti daytoy 2017 dagiti abusado nga employer iti tallo nga industria.

Kuna ti DoLE a mangilungalongda iti mabiit iti panag-audit kadagiti sektor ti healthcare, konstruksion, ken turismo kalpasan ti pannakaawatda kadagiti sumagmamano a reklamo iti panagsalungasing maipanggep iti sueldo kadagitoy nga industria.

Imbunannag ni Labor and Employment Secretary Silvestre Bello III a nabukelnan ti grupo dagiti aginspeksion para iti sektor ti healthcare tapno kitaenda dagiti naireport nga ilegal a mapaspasamak kadagiti sumagmamano nga abusado nga ospital a kas iti panagusarda kadagiti on-the-job (OJT) trainees tapno saandan nga agala kadagiti regular nga empleado.

Kuna ni Bello a saan a maiparbeng ti kaadda dagiti OJT a saan a mabaybayadan ken kaadda dagiti nurse nga agsanay nga isuda pay ti agbayad kadagiti ospital.

Kuna pay ni Bello a kitaen pay ti grupo dagiti naireport a nurse kadagiti pribado a sektor a bassit-usit ti sueldoda.

Kuna met ni Labor Undersecretary Dominador Say a ti resulta ti panagarisit nga iwayat ti nasao a grupo ti usarenda iti panangbalabalada iti baro a Department Order tapno agserbi a kas pagalagadan para iti sektor ti healthcare, kas iti inaramidda kadagiti kontraktor.

Kuna ni Bello a kastoy met laeng ti aramidenda a proseso kadagiti sektor ti konstruksion ken turismo tapno masigurado nga agpada dagitoy a sumurot kadagiti pagannurotan ti gobierno iti pannakayimplimentar dagiti istandard iti pannangged (labor) ken salun-at (health).


(Naipablaak iti Bannawag, Enero 9, 2017 a bilang.)

Pasnaan 7, sangailien ti GUMIL DepEd Urdaneta

Agraman ti espesial a miting ti GUMIL Filipinas inton Enero 15

Iti daytoy maikapito nga edision ti  Pasnaan, workshop iti literatura dagiti mannurat nga Ilokano, sangailien ti GUMIL DepEd Urdaneta (sanga ti GUMIL Pangasinan) nga idauluan ni DepEd Urdaneta District Supervisor Dr. Edmundo Bisquera, iti pannakitinnulong ti Urdaneta City Schools Division ken ti Office Of City Vice-Mayor Hon. Julio F. Parayno. Manamnama met ti pannarabay manipud iti National Commission for Culture and the Arts (NCCA) ken ti Bannawag magazine.

Maiwayat ti Pasnaan 7 inton Enero 13-15, 2017 (nayalud-od manipud iti Disiembre 2-4, 2016 ken Nobiembre 18-20 nga immun-una a naipakaammo) iti Badipa Elementary School iti Bayaoas, Urdaneta City.

Sangapulo a mannurat nga Ilokano ti agpaay a fellow. Dagiti fellow iti Ababa a Sarita: Derick Añonuevo Tong-alan ti Balidbid, Salcedo Ilocos Sur; Eunice Bisquera-Madriaga ti Casantiagoan, Manaoag, Pangasinan; Fidel Sambaoa ti Matue, Gregorio del Pilar, Ilocos Sur; ken Rhea Anne Dominno ti Kaliwakiw, Salcedo, Ilocos Sur.

Dagiti fellow iti Daniw: Alma Dela Cruz ti Allacapan, Cagayan; Julius P. Gajonera ti Brgy. 1, Barbaquezo, Carasi, Ilocos Norte; Josefa B. Agtarap ti Brgy. 62-A Navotas, Laoag City (Ilocos Norte) ken Riaflor Bulatao Rebolledo ti Happy Homes, Old Lucban, Baguio City.

Dagiti fellow iti Daniw a Para Ubbing: Rudelyn M. Javar ti Mabanogbog, Urdaneta City, ken Leona Joaquin Corpuz ti Urdaneta City, Pangasinan.

Agtugaw a kas panelist dagiti mannurat ken editor nga Ilokano a da Cles B. Rambaud, Juan Al. Asuncion, Joel B. Manuel, Daniel L. Nesperos, Neyo Mario E. Valdez, John B. Buhay. Estela A. Bisquera-Guerrero, Sherma E. Benosa, Junley L. Lazaga, ken Roy V. Aragon.

Malaksid iti itutulongda iti pannaka-workshop dagiti sinurat dagiti fellow, mangipaay met dagiti panelist iti ababa a lektiur maipapan iti ortograpia ti lengguahe nga Ilokano, daniw, ababa a sarita, daniw a para ubbing, ken ababa a sarita a para ubbing.

Agatendar met a kas observer iti workshop dagiti mannursuro manipud iti Urdaneta City Schools Division nangruna dagiti MTB-MLE Coordinator.

Mabigbig a kakaisuna a workshop a para kadagiti mannurat nga Ilokano ken mannurat iti Amianan a makasurat iti Ilokano, maysa ti Pasnaan kadagiti tinawen a kangrunaan a proyekto ti GUMIL Filipinas a pagtitinnulongan a supsuportaran dagiti managayat iti literatura ken dagiti mannurat a mismo.

Agserbi a kameng ti secretariat ti Pasnaan 7 da Ariel S. Tabag, Dr. Freddie Pa. Masuli, Roy V. Aragon, Anna Liza M. Gaspar ken Rhea Rose D. Berroy.

Da GF President Arthur P. Urata, Sr., ken Dr. Edmundo Bisquera ti agpaay a consultant. (Pasnaan 7 Secretariat)


(Naipablaak iti Bannawag, Enero 9, 2017 a bilang.)

Palagip iti Grand Final ti Salip iti Sarita ti ALVIYA

Ipalagip ti Secretariat ti  ALVIYA  Literary Foundation nga agpatingga ti panagawat ti Secretariat kadagiti maisalip iti Grand Final ti Salip iti Sarita (Pasalip ALVIYA iti Sarita) iti Pebrero 28, 2017.

Maysa a gannuat daytoy Pasalip ALVIYA iti Sarita nga agpanggep a tumulong iti ad-adda pay a pannakaparang-ay ti Literatura Ilokana. Es-esponsoran daytoy ni Alex Vicente Yadao, tubo iti Libertad, Abulug, Cagayan ngem agnaeden iti New York, USA. Ni met Dr. Freddie Padua Masuli, maysa a mannursuro iti Cagayan State University, ti napusgan a mangimaton iti daytoy a pasalip.

Dagiti pagalagadan:

1. Dagiti laeng nangabak iti Pasalip ALVIYA iti Sarita iti 2012-2016 ti kualipikado a makisalip.

2. Nawaya ti makisalip a mangpili iti ania man a tema a kayatna a suraten.

3. Agatiddog ti pakisalip iti 10-25 a panid iti short bond paper, nai-computer babaen ti MS Word (agusar iti Times New Roman, Font Size 12)  iti doble espasio  ken addaan iti maysa a pulgada a margin iti amin nga igid ti bondpaper.

4. Maysa laeng a sarita ti maipalubos nga isalip ti tunggal mannurat a makisalip.  

5. Nasken a bukod a putar ti autor ti maisalip, saan pay a naipablaak iti ania man a magasin, ken saan a patarus manipud iti aniaman a lengguahe.

6. Ti laeng parbo a nagan ti autor ti agparang iti manuskrito a maisalip. Mapakuyogan ketdi ti opisial nga entry iti maysa pay a dokumento a nakailanadan dagitoy: paulo ti sarita, parbo ken pudno a nagan ken kabibiag ti autor agraman numero a pakakontakan kenkuana.

7. Ipatulod dagiti dua a dokumento (sarita ken ti impormasion maipanggep iti autor) babaen iti elektroniko a wagas (e-mail) iti daytoy nga e-mail account: freddie.padua.masuli@gmail.com.

8. Nasken a maipatulod iti Secretariat dagiti dua a dokumento iti saan a naladladaw ngem alas-11:59 ti Pebrero 29, 2016 (oras iti Filipinas).

9. Saan a mabaliwan ti pangngeddeng dagiti hurado malaksid no maduktalan a nasalungasing ti Pagannurotan Bilang 5. Awananto metten ti autor  iti gundaway a makisalip pay kadagiti masungad a pasalip ti ALVIYA.

10. Makipagtagikua ti ALVIYA Literary Foundation dagiti mangabak a sarita nupay addaan latta iti karbengan ti autor iti copyright daytoy. Maaddaan pay ti agpasalip iti karbengan a mangipablaak kadagitoy mangabak a sarita iti ania man a wagas a kayatna nga aramaten karamanen ti elektroniko ken tradisional a wagas ti panagipablaak.

11. Umawat ti Grand Winner iti Cash Prize a P50,000.00, sertipiko ti pammadayaw ken maysa nga ALVIYA medallion.

12. Mayawat ti premio ti Grand Winner bayat ti GUMIL Filipinas National Convention iti 2017.


(Naipablaak iti Bannawag, Enero 9, 2017 a bilang.)

ENERO 9, 2017

SARITA
 4 “Good Afternoon, Sir….”
     Jobert M. Pacnis
12 Buneng, Salmagi, Kalapaw, ken Tekka
     Reynaldo A. Duque

NOBELA
8 Baknangtan, Kayong! (26)
     D.S. Bulong
10 Kalinawa (2)
      Linda T. Lingbaoan

DANIW
6 Ania Ngaruden, Cervantes?
   Domay Solinggay
19 Agsublisubli Dagiti Palong
    Ronnie E. Aguinaldo
47 Daniw a Para Ubbing
    Shaila Jennelle Gorospe

SALAYSAY
14 Nalamiis ni Baketmo iti Kama, Kompadre?
     Virginia A. Duldulao, Ph.D.
26 Alisto a Pagpadakkel iti Manok ti Tubbog ti Sabila
    Reynaldo E. Andres

KOMIKS
35 Sweet Jazmine (17)
38 Don Clavio de Ylocos (19)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
18 Maliklikam Met ti Nagita nga Uleg
20 Kasano a Matiliwmo ti Atension Dagiti Estudiante?
22 Palagip iti Grand Final ti Salip iti Sarita ti ALVIYA
23 Siled ti Kararag
29 Idi Un-unana a Panawen
32 Ammuem Pay Dagitoy
33 Haytek!
34 Wen, Dimo Ipalubos nga Agbalinka ken ti Pamiliam a Biktima ti Aksidente
43 Ti Gasatmo Ita a Lawas
46 Dagiti Pabula ni Aesop