Super Umaabel

SUPER UMAABEL. Sipapannakel dagitoy nga inna ken umaabel a taga-Barangay Nagbacalan, Paoay, Ilocos Norte a mangipakpakita kadagiti produktoda a kaay-ayo dagiti turista a gatangen gapu iti naisangsangayan a disenio ken kalidadda. Ti grupo dagiti umaabel a babbai iti Ilocos Norte ti maysa kadagiti kaaktibuan a makiparpartisipar iti tinawen a “Partuat ti Kailokuan Trade Fair” a programa ti Department of Trade and Industry babaen ti suporta ti gobierno probinsial ti Ilocos Norte. Maang-angay ti “Partuat” iti Dap-ayan Center ti Siudad ti Laoag ken agpaut agingga iti Disiembre 30, 2016. Agpakanawan: Lorna Cabugon, Perlita Domingo, ken Brenda Omotoy. (Leilanie G. Adriano)


(Naipablaak iti Bannawag, Enero 2, 2017 a bilang.)

PhilHealth card, saan a nasken iti ospital ti turay

Saanen a nasken a mangipakita dagiti pasiente nga agpaagas kadagiti ospital ti gobierno iti PhilHealth card a kas kondision tapno maipaay kadakuada dagiti benepisio manipud iti PhilHealth.

Kinuna ni Senate Minority Leader Ralph Recto a ti pannakapukaw ti pagannurotan a “No PhilHealth ID, No Benefits” ket maysa laeng kadagiti adu a probision a pinanday ti Senado a nairaman iti 2017 P3.3-trillion national budget tapno maipanamnama ti pannakasaluad ti salun-at dagiti umili.

Sagudayen ti probision nga inesponsoran ni Recto nga awan ti asino man a Filipino a di maipaayan iti Philhealth benefits gapu laeng ta awan ti maipakitana a PhilHealth card.

Inlawlawag ketdi ni Recto a ni Sen. Loren Legarda ti nangesponsor iti kadakkelan a gannuat a mainaig iti PhilHealth. Isu daytoy ti pannakailatang ti P3-bilion a kas bayad ti insurance premium ti mapattapatta a “maudi a walo a milion a Filipino a saan  pay a naiseguro.”

Ti pannakailatang ti P3-bilion ti mangipanamnama nga awanen ti Filipino a saan a maawat nga agpaagas kadagiti ospital ti gobierno, kas kuna ni Recto.


(Naipablaak iti Bannawag, Enero 2, 2017 a bilang.)

No adda gobierno pederal: Duterte, inkarina nga umulog iti takem

Inkari manen ni Presidente Rodrigo Duterte nga umulog iti takem iti kanito  nga aprobaran dagiti umili iti daytoy 2017 ti diaya a maaramid a pederal ti klase ti gobierno.

Daytoy ti kuna ti Presidente iti maysa a panagbitlana iti maysa a pasken iti Paskua iti Malakanyang.

Kas kuna ti Presidente, saan a pudno ti ibagbaga dagiti kritiko nga idurduronna ti pederalismo ta kayatna ti agtalinaed iti turay kalpasan ti terminona nga agpaut iti innem a tawen. Impaganetget ni Duterte a dina kasapulan daytoy (kinapresidente) a trabaho.

Innayonna a kalikagumanna laeng a maaddaan iti panagbalbaliw ti Mindanao—a mapasamak laeng no agbalin a pederal ti gobierno ti pagilian.


(Naipablaak iti Bannawag, Enero 2, 2017 a bilang.)

ENERO 2, 2017

SARITA
12 Ni Poldo ken Dagiti Uppat a Pato
      Juan Al. Asuncion
16 No Aggibusen ti Ayug
     Abraham Pasion

NOBELA
8 Baknangtan, Kayong! (25)
     D.S. Bulong
10 Kalinawa (1)
      Linda T. Lingbaoan

DANIW
6 Dagiti Dila ti Apuy
    Junley L. Lazaga
20 Dagaang
     Roy V. Aragon
47 Daniw a Para Ubbing
     Jocelle Calaramo

SALAYSAY
4 Ania ti Aramidentayo ken ni Michael?
     Remedios S. Tabelisma-Aguillon
26 Nakaramankan iti Yakon?
    Reynaldo E. Andres

KOMIKS
35 Miks & Tiks
37 Sweet Jazmine (16)
40 Don Clavio de Ylocos (18)

KOLUM
15 Kastoy, Kapid, Ditoy Hawaii
19 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
14 Biag ni Ilokano
18 Siled ti Kararag
22 Naganas Kadi Met Laeng ti Agsursuro iti Klasrummo, Ma’am?
23 Ania Kadi ti Galad Dagiti Uleg?
29 Idi Un-unana a Panawen
32 Ammuem Pay Dagitoy
33 Haytek!
34 Napeggad Kadi ti Agnaed iti Balayyo?
43 Ti Gasatmo Ita a Lawas
46 Dagiti Pabula ni Aesop

Maika-3 a Salip iti Daniw ti Saniata Prize

Panggep ti Saniata Prize ti agbalin a maysa kadagiti paratignay dagiti mannaniw nga Ilokano nga agparnuay kadagiti baro a langa ti daniw nga Ilokano bayat met ti panagbigbigda kadagiti kannawidan a porma ti daniw nga Ilokano.

Narugian idi 2015, tinawen daytoy a pasalip. Maipaayan iti pammadayaw a Hall of Fame ti makayalat iti tallo nga Umuna a Gunggona.

Dagiti Pagannurotan:

1. Maysa a daniw laeng ti idatag. Saan a makedngan ti tema, porma wenno kaatiddog ti isalip a daniw.

2. Masapul nga orihinal, di pay naipablaak, wenno saan a naipatarus manipud iti sabali a lengguahe ti isalip a daniw. No matakuatan a nabalusingsing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Saniata Prize.

3. Deadline ti panagidatag: Marso 15, 2017. Ipatulod babaen ti e-mail ti pakisalip iti asseng.tabag@gmail.com iti subject a “3rd Saniata Prize.”

4. Masapul nga agusar iti nagan iti pluma (pen name) ti mannaniw. Iraman ketdi iti e-mail ti kompleto a nagan, numero iti selpon, ken adres ti pagtaengan wenno opisina.

5. Dagiti premio: 1st Prize: Php2,500.00; 2nd Prize: Php 2,000; 3rd Prize: Php1,500.00.

6. Mapadayawan dagiti mangabak inton Abril 21, 2017 bayat ti kombension ti GUMIL Filipinas.

7. Makipagtagikua ti Saniata Prize kadagiti mangabak a daniw ket awan sungsungbatanna kadagiti mannaniw no bilang usarenna dagitoy iti ania man a wagas kas iti pannakaipabuya, pannakaipablaak iti magasin wenno libro, ken pannaipaskil iti social media. Agtalinaed ketdi ti copyright iti autor wenno mannaniw.


(Naipablaak iti Bannawag, Disiembre 26, 2016 a bilang.)

Groupie Dagiti Biuti

GROUPIE DAGITI BIUTI. Bayat ti panagpaspasiarda, saan a nagpaudi dagitoy 11 a kandidata ti Miss Universe a nagpaala iti retrato iti sango ti batonlagip ni Dr. Jose Rizal iti Rizal Park (Luneta) itay Disiembre 12. Mairaman dagitoy napipintas a dayag kadagiti makisalip iti Miss Universe 2016 a maangay iti Filipinas. Mabalangatan met ti mangabak itoy nga Enero 2017. (Ali Vicoy)


(Naipablaak iti Disiembre 26, 2016 a bilang ti Bannawag.)

Tinungbo

TINUNGBO. Ipakpakita ni Elena Diwa ti Barangay Cuenca, Pugo, La Union ti tinungbo (kankanen a naluto iti tubong) iti damo a pannakaangay ti Tinungbo Festival iti Pugo, La Union. Indauluan ni Mayor Priscilla Martin, 2nd district Congresswoman Sandra Eriguel, La Union Gov. Emmanuel Ortega III ken ti asawana a ni ABONO Partylist Representative Vini Ortega ti pannakalukat ti 1st Tinungbo Festival iti 105th Founding Anniversary ti nasao nga ili idi Disiembre 10. (Zaldy Comanda)


(Naipablaak iti Bannawag, Disiembre 26, 2016 a bilang.)

Sangkap Ilokano Arts, pinili ti DSWD a partner

Pinili ti Department of Social Welfare and Development (DSWD) Field Office I, nga ipanguluan ni Regional Director Marcelo Nicomedes J. Castillo, ti Sangkap Ilokano Arts a kas training partner-na para ti implementasion ti 2016 Sustainable Livelihood Program (SLP) iti Bangar, La Union.

Mainaig iti daytoy, sinanay ti Sangkap ti 50 a babbai a kameng ti DSWD Pantawid Pamilyang Pilipino Program (4Ps) iti Bangar iti "Loofah Processing and Product Development." Naangay ti makalawas a panagsanay iti Bangar Training Center  babaen ti suporta ti LGU Bangar nga idauluan ni Mayor George B. Pinzon.

Naisuro kadakuada ti panagdisenio kadagiti nadumaduma a produkto nga agtaud iti loofah (kabatiti) fibers a mabalin a  mausar a dekorasion kadagiti pagtaengan ken opisina.

Kas tulongna kadakuada, nangted ti Sangkap kadagiti kasapulan dagiti nagsanay a pangrugian a raw material agraman ti sagsasangagasutda a bukel ti atap a kabatiti. Nangted met ti DSWD kadagiti kasapulanda a ramit.

Timmarabay iti naangay a panagsanay da Agnes LL. Tambalo, Regional Program Coordinator ti SLP-DSWD FOI; CDED Officer Ardel C. Laroya; Chad Everett Llanes, SLP Provincial Coordinator; Charmina Caccam Cruz, PDO II, ken Amalia E. Gavina, MSWDO.

Maysa a tumantanor nga espesialista iti produksion ti loofah home decors ti Sangkap Ilokano Arts a kukua da Djuna R. Alcantara ken Ed H. Angco.


(Naipablaak iti Bannawag, Disiembre 26, 2016 a bilang.)

Libre nga irrigasion, health care, edukasion, naponduan iti nailian a badiet

Addaan iti libre nga irigasion a para kadagiti mannalon, libre a pannakataripato ti salun-at, ken libre nga edukasion.

Kastoy ti panangiladawan ni Sen. Loren Legarda iti nailian a badyet a para iti 2017 nga inaprobaran ti Senado ken Kamara iti bicameral conference ti Kongreso itay lawasna.

Aganay iti 3.3 trilion a pisos ken awanan iti ‘pork barrel,’ kuna ni Legarda nga ipagpannakkelda daytoy a badyet gapu kadagiti nadakamat a makaigapu. “Kasla socialist,” kinuna ni Legarda.

Innayonna nga inaramidda ti amin a kabaelanda tapno maragsakan ti amin a sektor ken maipaay ti kasapulan dagiti umili.

Kalpasan ti panangaprobar ti Kongreso, mayawat ti diaya a 2017 General Appropriations Act (GAA) ken ni Presidente Rodrigo Duterte para iti panangaprobar wenno dina panangaprobar iti daytoy.


(Naipablaak iti Bannawag, Disiembre 26, 2016 a bilang.)

DISIEMBRE 26, 2016

SARITA
4 Dagiti Kampana
   F. Sionil Jose
12 Ti Ubing a Mamati ken ni Santa Claus
   Prescillano N. Bermudez

NOBELA
8 Baknangtan, Kayong! (24)
     D.S. Bulong
10 Ni Manang Amor, ni Mama Nam, ni Papa J, ken Siak (Maudi a Paset)
      Juan S.P. Hidalgo, Jr.

DANIW
5 Ti Pannakaipasngayko Manen
    Arnold C. Baxa
6 Kadagiti Naliplipatan
    Rosalie V. Calpito
47 Daniw a Para Ubbing
     Elizabeth B. Madarang-Raquel

SALAYSAY
14 Adda Paskua No iti Pusotayo, Adda ni Ayat
     Fr. Melchor B. Palomares
26 Wen, Dakkel Met ti Mapastrek iti Panagmula iti Carrot iti Patad
    Reynaldo E. Andres

KOMIKS
35 Sweet Jazmine (15)
38 Don Clavio de Ylocos (17)
41 Miks & Tiks

KOLUM
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Ading Kosinera
31 Tips
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
18 Masmasdaawka iti Galad ti Baboymo?
20 Dagiti Pagannurotan ti 3rd Saniata Prize
22 Ti Digital a Teknolohia ken Dagiti Pagadalan
23 Haytek!
29 Idi Un-unana a Panawen
32 Ammuem Pay Dagitoy
34 Kasanon No Adda Uram?
43 Ti Gasatmo Ita a Lawas
46 Dagiti Pabula ni Aesop

Kalinawa, nayalnag itay Disiembre 11

Nayalnag ti libro a Kalinawa, nobela ni Linda T. Lingbaoan-Bulong itay Disiembre 11 bayat ti maika-50 nga anibersario ti GUMIL Metro Manila (GMM), iti Penthouse Hall ti Aberdeen Court iti Quezon Avenue, Quezon City.

Patanor ti Abra ni LTLB, Leona Florentino awardee ti GUMIL Filipinas ken Gawad Pambansang Alagad ni Balagtas awardee ti UMPIL.

Grantee ti National Book Development Board idi 2013, tinaming ti nobela ti maipapan iti Kaitnegan iti Abra.

Kadagiti interesado a maaddaan iti kopia, makiuman iti autor iti 0977 499 2707.


(Naipablaak iti Bannawag, Disiembre 19, 2016 a bilang.)

Awan visa iti ipapan iti China, maad-adal

Ad-adalen ti People’s Republic of China (PROC) no mabalin a pastrekennan iti China dagiti sumarungkar sadiay a Filipino uray awan visa dagitoy.

Daytoy ti impalgak ni Jose Santiago “Chito” L. Santa Romana itay lawasna bayat ti panangsalaknibna iti bagina no apay a rumbeng nga aprobaran dagiti senador ken diputado a kameng ti foreign affairs committee ti bicameral Commission on Appointments (CA) ti pannakadutokna a kas Ambassador to China.

Kinuna ni Santa Romana a ti singasing iti “visa-free visit” ket paset dagiti adu a katulagan a napirmaan iti nagbaetan da Presidente Duterte ken Chinese President Xi Jinping iti ibibisita ti immuna iti China sumagmamanon a bulan ti napalabas.

Kinuna pay ni Santa Romana, bayat ti committee hearing nga indauluan ti chairman daytoy a ni Sen. Panfilo Lacson, a nagdoble met ti kaadu dagiti Intsik a bimmisita iti Filipinas kalpasan ti ibibisita ni Presidente Duterte iti China.

Nupay kasta, kinuna ni Santa Romana a saan a kayat a sawen daytoy a pinalukayanen ti Filipinas ti tignayna kontra iti ilegal nga iseserrek iti Filipinas ta rumbeng met a salakniban ti pagilian dagiti bukodna a pagimbagan.


(Naipablaak iti Bannawag, Disiembre 19, 2016 a bilang.)

KWF, agkasapulan iti adu nga agipatpatarus

Kalpasan ti panangangayna iti dua a sesion a para iti Sertipikong Programa sa Pambansang Pagsasanay sa Pagsasalin (Batayang Antas) idi Hunio ken itay Nobiembre, agawis manen ti Komisyon sa Wikang Filipino (KWF) kadagiti fellow nga agatendar iti maikatlo a sesion.

Daytoy a certificate program ket maysa a crash course maipanggep iti pakasaritaan, kinapateg, dagiti klase, ken dagiti addang iti panagipatarus.

Maangay daytoy iti opisina ti KWF iti Malacanang compound iti Manila inton Enero 11-13, manipud iti alas 8 iti bigat agingga iti alas 5 iti malem.

Panggep daytoy a certificate program a sanayen ti ad-adu pay a Filipino iti arte ti panagipatarus babaen ti panangaramatda iti Filipino ken dadduma pay a lengguahe iti Filipinas, mangipakita iti laing dagiti Filipino iti panagsurat iti literatura, siensia, teknolohia, ken dadduma pay a tay-ak ti pagsiriban, ken tapno maaramid ti listaan dagiti agipatpatarus a makatulongto iti KWF kadagiti panggepna nga aramiden iti tay-ak ti panagipatarus.

Makiddaw kadagiti interesado nga agatendar iti certificate program a mangipatulodda babaen ti e-mail iti curriculum vitae ken dua (2) a patarusda a daniw iti Filipino (manipud iti Ingles) agraman ti orihinal a teksto ti daniw iti Ingles iti pagsasalin101@gmail.com sakbay wenno agingga iti Disiembre 31. Apaman a maawat ti KWF daytoy, patulodan ti KFW ti aplikante iti diagnostic exam a mainaig iti Ortograpiyang Pambansa (OP) ken kadagiti pagsursuruan nga aktual a patarus.

Makiddaw pay kadagiti amin nga aplikante a basaenda ti OP ken ti Batayang Pagsasalin (mabalin nga i-download manipud iti www.kwf.gov.ph) sakbay nga agatendar iti seminar.

Para iti nayon nga impormasion, mabalin a kauman ni  Grace Bengco ti Sangay ng Salin iti (02) 243-9789 wenno iti 0939-8538834.


(Naipablaak iti Bannawag, Disiembre 19, 2016 a bilang.)

Salip iti Sarita ti 15th RFAAFIL

Panagsurat iti sarita a para ubbing ti maysa kadagiti mapagsasalipan (salip iti daniw a para ubbing ti sabali pay) iti maika-15 nga edision ti Reynald F. Antonio Awards for Ilokano Literature (2016-2017). Uray ania a topiko ti tamingen ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

Dagiti Pagannurotan: 

1. Silulukat ti salip kadagiti amin a mannurat iti Ilokano. Aggibus ti salip iti Pebrero 28, 2017 (saan nga Enero 31, 2017, kas immuna a naipakaammo iti website ti RFAAFIL.)

2. Agatiddog ti sarita iti di nasursurok ngem 10 a panid. Maimakinilia wenno maikompiuter iti doble espasio iti regular bond paper size. Maysa laeng a sarita ti mabalin nga isalip ti tunggal mannurat.

3. Ti parbo a nagan ti maaramat iti manuskrito a pakisalip. Dua nga MS Word document files ti isubmitir babaen ti  e-mail. Umuna: ti sarita a pakisalip. Maikadua: ti parbo ken pudno a nagan ken ti pakasaritaan ti biag ti autor,  ken nasken a mangiragpin ti autor iti palawag no kasano, kaano ken no apay a nasuratna dayta a sarita. Saan ketdi a pagbatayan daytoy iti pannakapili ti saritana ngem mabalin a pakadiskualipikaranna.

4. Sarita a para ubbing ti suraten. Uray ania a topiko ti tamingen ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

5. Nasken nga orihinal, di pay naipablaak, di naadaw iti ania man a sinurat ken di pay nangabak iti ania man a salip iti panagsurat ti mabalin nga isalip.

6. Agbalin a kukua ti esponsor dagiti mangabak a sarita. Karbenganna pay ti mangedit ken mangipablaak iti Internet (www.rfaafil.com), magasin wenno periodikal a pilina, wenno mangilibro kadagitoy nga awan ti sungsungbatanna iti autor. Agtalinaed ketdi ti copyright iti autor.

7. Saan a mabalbaliwan ti desision dagiti hurado malaksid no matakuatan kalpasanna a linabsingna ti Pagannurotan Bilang 5. Iti kasta a panaglabsing, maibabawi ti gunggona ket saanto metten a mapalubosan ti autor a makisalip iti ania man a salip nga esponsoran ti RFAAFIL.

8. Dagiti gunggona: First Prize: Php5,000.00; Second Prize: Php4,000.00; Third Prize: Php3,000.00; Fourth Prize: Php2,000.00; Fifth Prize: Php1,000.00 ken mabalin a manayonan wenno maksayan dagiti gunggona agbatay iti pangngeddeng dagiti hurado. Addanto pay sertipiko a maited kadagiti mangabak. Maipaay met ti Reader’s Choice Award ken maysa a laptop computer iti sarita a magustuan dagiti ubbing a readers.

9. Mapadayawanto dagiti mangabak iti GUMIL Filipinas Annual Convention wenno iti pasken nga angayen ti RFAAFIL inton kalgaw ti 2017.

10. Ipatulod ti pakisalip babaen ti e-mail. Iturong iti admin@rfaafil.com ken rfaafil@hotmail.com.

11. Nasken a maipatulod babaen ti e-mail ti pakisalip iti di naladladaw ngem ti petsa a panaggibus ti salip.


(Naipablaak iti Disiembre 19, 2016 a bilang ti Bannawag.)

DISIEMBRE 19, 2016

SARITA
4 Ni Inang
    Norberto D. Bumanglag, Jr.
12 Ti Atang, ti Temtem, ken ti Sangapuon a Mangga
     Meliton Gal. Brillantes

NOBELA
8 Ni Manang Amor, ni Mama Nam, ni Papa J, ken Siak (3)
      Juan S.P. Hidalgo, Jr.
10 Baknangtan, Kayong! (23)
     D.S. Bulong

DANIW
5 Ngayemngem iti Dalan
   N.M.E. Valdez
6 Simmarungkarka Kadi Ita a Rabii?
    Linda T. Lingbaoan
47 Daniw a Para Ubbing
     Ronelyn B. Ramones

SALAYSAY
14 ‘Tay Mangted, Awan Maksay Kenkuana
     Remedios S. Tabelisma-Aguillon
26 Agmulatayo Man iti Sago
    Reynaldo E. Andres

KOMIKS
35 Sweet Jazmine (14)
38 Don Clavio de Ylocos (16)
41 Miks & Tiks

KOLUM
19 Saludsodem ken ni Apo Hues
22 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
18 Nasalun-at Kadi ti Nalukmeg nga Aso?
21 Dagiti Pagannurotan ti Salip iti Sarita a Para Ubbing ti 15th RFAAFIL
23 Haytek!
29 Idi Un-unana a Panawen
32 Ammuem Pay Dagitoy
34 Kasano a Mayanay ti Matgedan?
43 Ti Gasatmo Ita a Lawas
46 Dagiti Pabula ni Aesop

Salip iti Daniw ti 15th RFAAFIL

Panagsurat iti daniw a para ubbing ti maysa kadagiti mapagsasalipan iti 15th Reynald F. Antonio Awards for Ilokano Literature wenno RFAAFIL (2016-2017). Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

Dagiti Pagannurotan:

1. Silulukat ti salip kadagiti amin a mannaniw iti Ilokano (Iluko).

2. Agatiddog ti daniw iti di ab-ababa ngem 20 a linia ken naikompiuter wenno naimakinilia iti maysa a panid ti bond paper. Mabalin a maysa wenno dua a daniw ti isalip ti tunggal mannaniw. Masapul nga orihinal daytoy ken di pay naipablaak iti uray ania a magasin, pagiwarnak wenno Internet.

3. Nawaya ti mannaniw a mangsurat iti estilo wenno sukog ti daniw ngem nasken a para ubbing ti daniw a putarenna. Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

4. Ti laeng parbo a nagan ni mannaniw ti agparang iti daniw. Nasken a mangusar iti agsabali a parbo a nagan no panggep ti mangisalip iti dua a daniw. Dua nga MS Word document files ti isubmitir babaen ti e-mail. Umuna: ti daniw a pakisalip. Maikadua: ti pudno ken parbo a nagan ken pakasaritaan ti biag ti autor.

5. Agbalin a kukua ti esponsor dagiti mangabak a daniw. Karbenganna pay ti mangedit ken mangipablaak iti Internet (www.rfaafil.com), magasin wenno periodikal a pilina, wenno mangilibro kadagitoy nga awan sungsungbatanna iti mannaniw. Agtalinaed ketdi ti copyright iti autor.

6. Dagiti gunggona: Umuna, P2,000.00 ken sertipiko; Maika-2, P1,500.00 ken sertipiko; Maika-3, P1,000.00 ken dua a consolation prize a sag-P500 ken sertipiko. Mabalin a mangabak ti maysa a mannaniw iti dua a premio. Mabalin pay a manayonan wenno maksayan dagiti gunggona depende iti pangngeddeng dagiti hurado. Maipaay met ti Reader’s Choice Award iti daniw a magustuan dagiti ubbing a readers.

7. Saan a mabalbaliwan ti pangngeddeng dagiti hurado malaksid no matakuatan kalpasanna a linabsingna ti Pagannurotan Bilang 2.

8. Mapadayawanto dagiti mangabak iti GUMIL Filipinas Annual Convention wenno iti pasken nga angayen ti RFAAFIL inton kalgaw ti 2017.

9. Ipatulod ti pakisalip babaen ti e-mail. Iturong iti admin@rfaafil.com ken rfaafil@hotmail.com.

10. Nasken a maipatulod babaen ti e-mail ti pakisalip iti di naladladaw ngem Pebrero 28, 2017 (saan nga Enero 31, 2017, kas immuna a naipakaammo iti website ti RFAAFIL).


(Naipablaak iti Bannawag, Disiembre 12, 2016 a bilang.)

Kannawidan iti Hawaii

KANNAWIDAN ITI HAWAII. Naipakadawyanen kadagiti Filipino iti Hawaii ti panagpipinnadigo iti ania man a yamanenda a kas iti daytoy a sekta, ti Church of Christ (Christian community) iti Salt Lake iti Honolulu. Kas paset iti pannakaselebrar ti Thanksgiving iti Estados Unidos, boluntario a nagitugotda kadagiti ania man a datonda para ken ni Apo Dios ket kalpasan iti church service, yaplagda amin dagitoy tapno pagbibingayan met laeng dagiti mayat a pumidut. (Leilanie G. Adriano)


(Naipablaak iti Bannawag, Disiembre 12, 2016 a bilang.)

Iti Enero 2017: Pension dagiti retirado a kameng ti SSS, manayonan iti P1,000

Inteden ti Senate Committee on Government and Public Enterprises ti pammalubosna iti Social Security System (SSS) a mangipakat iti P1,000 a nayon ti pension dagiti retirado a kameng ti SSS mangrugi iti Enero 2017.

Daytoy a kantidad ti kagudua ti singasing a P2,000 a mainayon iti pension a pinagugar ken inaprobaran sakbayna dagiti agpampanday-linteg kalpasan nga imbasura ti administrrasion ni dati a Presidente Benigno S. Aquino.

Kinuna ni Sen. Richard Gordon, pangulo ti komite, nga immanamong a kaguduana laeng ti mainayon iti pension tapno saan a madidigra ti pondo ti SSS. Kiniddawna ketdi nga ikagumaanan koma ti SSS nga ited ti sabali pay a kagudua inton tawen 2020 tapno makompleto ti P2,000 a nayon a pension.


(Naipablaak iti Bannawag, Disiembre 12, 2016 a bilang.)

Gunglo dagiti mannurat nga Ilokano iti Canada, nabuangay

Addan GUMIL Canada, gunglo dagiti mannurat nga Ilokano iti Canada, babaen ti pammalubos ti liderato ti GUMIL Filipinas.

Napili ni Prodie Gar. Padios, dati a Literary Editor ti Bannawag, a presidente daytoy baro a sanga ti GF. Agpapaay ita ni Padios, tubo iti Sta. Teresita, Cagayan, a Circulation District Manager ken part-time Desk Editor ti Red Deer Advocate, maysa nga aginaldaw a pagiwarnak iti Central Alberta.

Kadua ni Padios a nabotosan da Eduardo A. Padaoan (Ontario), vice-president; Johmar R. Alvarez (Ontario), secretary-general; Imelda D. Toledo (Alberta), treasurer;  Quintin Mariano (Ontario), auditor; Remy E. Piano (Regina), business manager; Abril Varilla (British Columbia), PIO; Board of Directors: Jovito L. Favila (Ontario), Gilbert Gante (Alberta), Arlane Ellorin (Washington), Sheila Bacani Camangian (Ontario), Maryjane Daligcon-Aragon (Oman), Norberto Bumanglag Jr. (Las Vegas), Jefferson Apolonio (Maryland) ken Majelyn Monces (Singapore).

Dagiti mammagbaga: Dionisio S. Bulong, Arthur P. Urata, Sr., Cles B. Rambaud, Aurelio S. Agcaoili, Linda Lingbaoan-Bulong, ken Ariel S. Tabag.

Kas mayannurot iti Constitution and By-Laws ti GUMIL Filipinas, dua a tawen ti termino dagiti nabotosan nga opisial.  Ngem gapu ta maangay ti eleksion ti GF iti daytoy Abril 2017, napagnunumuan ti grupo nga agtakem dagiti opisial agingga iti 2019.

Panggep met ti gunglo a paaduen ti miembrona saan laeng nga iti uneg ti Canada, isu a nagawat kadagiti agkameng a mannurat kadagiti ballasiw-taaw malaksid kadagiti adda iti Hawaii ken Hong Kong nga adda aktibo a chapter ti GUMIL kadagitoy.

Kas kadagiti sabsabali a sanga ti GUMIL, kangrunaan a panggep ti GUMIL Canada ti pannakataginayon ken pannakapasantak ti literatura ken lengguahe nga Ilokano babaen ti pannakaparegta dagiti mannurat nga Ilokano, ken pannakaipaay iti gundaway kadagitoy a makaipablaak babaen ti panagilibro. (J.R. Alvarez)


(Naipablaak iti Bannawag, Disiembre 12, 2016 a bilang.)

Fighting Pogi, mayalnag iti daytoy Disiembre 11

Iti kamaudiananna, maysa met laengen a libro ti maibilang a kalatakan a makapakatawa a nobela nga Ilokano, ti Fighting Pogi a sinurat ni Dionisio S. Bulong, retirado nga editor ti Bannawag ken nagtakem a presidente ti GUMIL Filipinas.

Mayalnag daytoy iti maika-50 nga anibersario ti GUMIL Metro Manila (GMM), iti daytoy Disiembre 11, 2016 iti Penthouse Hall ti Aberdeen Court iti Quezon Avenue, Quezon City.

Maipapan iti pannakigasanggasat ni boksingero a Macario, ibilang dagiti kritiko a daytoy a nobela ti “nangilanad” iti Simbaluca, Santa Teresita, Cagayan a lugar ti autor ken ti agbibiag, iti mapa ti Filipinas.

Para iti order a kopia, makiuman iti 09178058013 (Eden Bulong) ken/wenno iti eden.bulong@yahoo.com


(Naipablaak iti Bannawag, Disiembre 12, 2016 a bilang.)

DISIEMBRE 12 2016

SARITA
4 Iti Lugar Dagiti Mararaem
   Juan Al. Asuncion
12 Dagiti Bisil Ken ti Ladrilio
 A. Sanchez Encarnacion


NOBELA
8 Baknangtan, Kayong! (22)
     D.S. Bulong
10 Ni Manang Amor, ni Mama Nam, ni Papa J, ken Siak (2)
      Juan S.P. Hidalgo, Jr.

DANIW
5 No Naibagakon ti Amin a Kayatko nga Ibaga
   Mighty C. Rasing
6 Isu Pay
   Alegria Tan Visaya
18 2 a Soneto
     Honor Blanco Cabie
47 Daniw a Para Ubbing
     Marlyn G. Del Rosario

SALAYSAY
14 Ania, Saanen nga Agpasgar ni Kawitan?
     Virginia A. Duldulao, Ph.D.
26 Naay-ayoda iti Napintas a Saguday Dagitoy a Bin-i
    Reynaldo E. Andres

KOMIKS
35 Sweet Jazmine (13)
38 Don Clavio de Ylocos (15)
41 Miks & Tiks

KOLUM
16 Okeyka, Apong
19 Saludsodem ken ni Apo Hues
22 Dear Doc
24 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
21 Dagiti Pagannurotan ti Salip iti Daniw a Para Ubbing ti 15th RFAAFIL
23 Haytek!
28 Maawatam ti Ibagbaga ti Asom?
29 Idi Un-unana a Panawen
32 Ammuem Pay Dagitoy
34 Adda Asaynmentmo, Nakkong?
43 Ti Gasatmo Ita a Lawas
46 Dagiti Pabula ni Aesop

Salip iti Sarita ti 19th AMMAFLA

Para Kadagiti Agdadamo a Mannurat

Ipalagip ti Secretariat ti AMMA Foundation Literary Awards (AMMAFLA) nga aggibus ti Salip iti Sarita ti Maika-19 nga AMMAFLA iti Enero 31, 2017.

Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.

Dagiti pagannurotan ti maika-19 nga edision ti salip.

1. Aggibus ti salip iti Enero 31, 2017.

2. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Oktubre 24, 2016 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 19th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Enero 31, 2017. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti sabali a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 wenno ti Blng. 6, maibabawi ti premiona ken mapawilanton a makisalip iti ania man a pasalip ti AMMAFLA.


(Naipablaak iti Bannawag, Disiembre 5, 2016 a bilang.)