Lampitaw

LAMPITAW. Nakasaganan ti M/B Godfrey nga aglayag manipud iti pantalan ti ili ti Calayan, Cagayan. Maysa daytoy kadagiti dadakkel a lampitaw nga agbibiahe nga agpa-Aparri, Cagayan a makalaon iti sangagasut a katao malaksid kadagiti dadduma pay a nadadagsen a karga dagiti pasahero. P500 ti plete ti maysa. Sabali latta met ti plete dagiti nadadagsen a karga a kas koma iti irik, bagas, motorsiklo, ken dadduma pay. Nayon ti serbisio daytoy a lampitaw ti mangted iti tinapay wenno biskuit ken nalingta nga itlog kadagiti pasaherona. Ti Calayan ti kadakkelan kadagiti lima nga isla a mangbukel iti Babuyan Islands. Buklen ti ili ti Calayan ti uppat kadagiti isla ti Babuyan: ti Calayan, Camiguin, Dalupiri ken Babuyan. Paset met ti ili ti Aparri ti Fuga, ti maikalima nga isla. (Roselyn C. Campano)


(Naipablaak iti Bannawag, Hunio 6, 2016 a bilang.)

Kasapulan iti eskuela, saan a basta gatangen lattan, kuna ti EcoWaste

Saan a basta gumatang lattan kadagiti kasapulan iti eskuela ta mabalin nga addaan dagitoy kadagiti kemikal a makapatauda iti kanser.

Imballaag daytoy ti pollution watchdog nga EcoWaste Coalition kalpasan ti pannakapaneknekda iti kaadda ti ramen a makapataud iti kanser a nausar iti pannakapataud dagiti dadduma a kasapulan iti eskuela a magatang iti nadumaduma a tiendaan.

Mismo a ni toxicologist Dr. Erle Castillo ti nangidaulo iti panangibinglay iti impormasion a mainaig iti peggad nga ipaay ti ‘phtalate’ a natakuatanda nga adda iti sumagmamano nga school supplies.

Uppat iti lima nga school supplies nga inamirisda ti positibo iti toxic phthalates a DEHP ken DINP, dagiti kemikal a makaigapu iti hormonal imbalance iti tao. Karaman dagiti ramit nga addaan iti nangato a kemikal ti sumagmamano a bolpen, kapote, plastik nga embelop ken shoulder bag.


(Naipablaak iti Bannawag, Hunio 6, 2016 a bilang.)

Miss Ilocos Norte 2016

MISS ILOCOS NORTE 2016. Ni Roxette Gyle de Roxas iti pannakabalangatna a Miss Ilocos Norte 2016 iti coronation night ti Search for Miss Ilocos Norte a naangay idi Mayo 18 iti Ilocos Norte Centennial Arena. Agtawen iti 19 ken agtayag iti 5’8”, inyalat pay ni Roxette ti Best in Swimsuit and Best in Philippine Terno awards. Napili met a first runner-up ni Jazrell Mae B. Caldito, 20 ti ili ti Solsona; second runner-up ni Gwyneth Shaira Austria, 18, ti Vintar; third runner-up ni Marifil Inessa Tolen, 18, ti Sarrat; ken fourth runner-up ni Celine Joyce B. Martin, 15, ti Laoag City. (John Michael Mugas)


(Naipablaak iti Bannawag, Hunio 6, 2016 a bilang.)

HUNIO 6, 2016

SARITA
4 Awan Nabangles a Tinapay
   Juan Al. Asuncion

NOBELA
8 Ti Bastardo (12)
     Norberto D. Bumanglag, Jr.
12 Ni Anti Maring ken ni Triple M (11)
     Estela Bisquera-Guerrero

DANIW
6 Panaglibas a Mapan Mars
   Mighty C. Rasing
47 Daniw a Para Ubbing
   Marlyn Garcia-Del Rosario

SALAYSAY
14 Matuloy Met Laengen ti Pederalismo?
     Neyo Mario E. Valdez
18 Pudno a Naidumduma a Probinsia ti Batanes
     Virginia A. Duldulao, Ph.D.
26 Natalged Kadi Dagiti Mula a Genetically Modified?
     Reynaldo E. Andres

KOMIKS
35 Kimar
38 Gayang ni Lamang
41 Miks & Tiks

KOLUM
17 Saludsodem ken ni Apo Hues
21 Dear Doc
23 Haytek!
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
9 Netizone
10 Tao, Lugar, Pasamak
16 Biag ni Ilokano
20 Siled ti Kararag
22 No Suktam ti Kankanen ti Aso
29 Idi Un-unana a Panawen
32 Ammuem Pay Dagitoy
34 Panag-recycle iti Nailet a Kosina
43 Ti Gasatmo Ita a Lawas
46 Dagiti Pabula ni Aesop

Nadaldalus a Panagdaing

NADALDALUS A PANAGDAING. Ibilbilag dagitoy a komprador ti kinomprada a sadiwa a munamon manipud kadagiti daklisan iti Caroan, Gonzaga, Cagayan, iti iskrin a naigalut iti kawayan. Nagaramidda ti kastoy a pagbilagan imbes nga ibilagda lattan iti igid ti kalsada ta nadaldalus kano ti maidaing ta saan a matapokan manipud kadagiti agkaralabas nga adu a lugan. Malaksid iti dayta, saan pay a marugitan wenno makan dagiti ayup a kas koma dagiti aso wenno pusa. (Roselyn C. Campano)


(Naipablaak iti Bannawag, Mayo 30, 2016 a bilang.)

Panagsigarilio, paiparitko iti sibubukel a PH, kuna ni Duterte

Maysa kadagiti panggep nga ipatungpal ni nabotosan a Presidente ti Filipinas Rodrigo A. Duterte ti pannakaipakat iti sibubukel a pagilian ti “no smoking” policy a pakairamanan ti panagsigarilio kadagiti amin a nakubong a lugar a para iti publiko a kas kadagiti bar ken restaurant.

Iti lokal a programa ti telebision a “Gikan sa Masa, Para sa Masa,” kinuna ni Duterte a masapul daytoy para iti pagsayaatan dagiti Filipino.

“No kayatmo a masalakniban ti publiko, masapul nga agbalinka a brutal,” kinuna ‘toy Mayor ti Siudad ti Davao a nangipakat iti naballigi a “no smoking” policy kadagiti amin a lugar a para iti publiko iti siudad.

Innayon ni Duterte nga awan koma ti Filipino a mapilit a makalang-ab iti segunda mano nga asuk ti sigarilio ken awan koma ti mapalubosan nga agaramid kadagiti banag a makadangran iti biag ti sabali.

Mainaig iti daytoy a pakaammo ni Duterte, naragsakan ti HealthJustice Philippines, maysa a public health policy think tank.

“Maragsakankami iti daytoy a planona (ni Duterte) a mamagbalin iti Filipinas nga smoke-free. Iti nabayagen a panawen, nagan-anus dagiti Filipino iti pannakalanglang-abda iti segunda mano nga asuk ti sigarilio iti sadino man. Kinapudnona, 240 a Filipino ti matmatay iti inaldaw gapu kadagiti sakit a mainaig iti panagsigarilio,” kinuna ni Atty. Irene Reyes, managing director ti HealthJustice Philippines.

Malaksid iti panangiparit ni Duterte iti panagsigarilio kadagiti amin a publiko a lugar iti Davao, impaiparitna pay iti siudad ti fireworks display iti isasangbay ti Baro a Tawen.

(Naipablaak iti Bannawag, Mayo 30, 2016 a bilang.)

Museo de Bawang iti Pinili, Ilocos Norte

MUSEO DE BAWANG ITI PINILI, ILOCOS NORTE. Kas sentro ti industria a bawang iti entero a Filipinas, maysa a museum ti nakasagana a luktan ti gobierno lokal ti Pinili, Ilocos Norte a para iti publiko— ti Museo de Bawang— a masarakan iti igid ti national highway iti daytoy maysa kadagiti kaubingan ken kabassitan nga ili ti Ilocos Norte. Malaksid kadagiti exhibit a nakakuribot a bawang ken info board a mangipakpakammo kadagiti nadumaduma nga usar ti bawang a kas medisina ken rekado dagiti naiimas a luto iti Ilokandia, maipakpakita pay ditoy dagiti kadaanan a ramit ni Ilokano iti panagtalon. Iti agsumbangir nga igid, makita pay ditoy dagiti tagilako a naridon a bawang, lasona ken adda pay dagiti naproseso a produkto a kas iti garlic chips, nakabotelia nga inartem a sili ken dadduma pay a lokal a produkto ti probinsia. Kas maysa pay a pagpannakel ti ili, adda pay maysa nga exhibit iti panagabel ken dagiti naidumduma a disenio ti binakul a partuat ni Lola Magdalena Gamayo ti Pinili, maysa a GAMABA (Gawad sa Manlilikha ng Bayan) awardee ti National Commission for Culture and the Arts (NCCA). (Leilanie G. Adriano)


(Naipablaak iti Bannawag, Mayo 30, 2016 a bilang.)

MAYO 30 2016

SARITA
4 Balud
   Rhea Rose D. Berroy
14 Kaemem Laengen ‘Ta Ngiwatmo
   Segundo La. Foronda

NOBELA
8 Ni Anti Maring ken ni Triple M (10)
     Estela Bisquera-Guerrero
12 Ti Bastardo (11)
     Norberto D. Bumanglag, Jr.

DANIW
6 Isusuknal
    Daniel L. Nesperos
28 Apay?
    Alegria Tan-Visaya
47 Daniw a Para Ubbing
     Jimmy R. Agustin

SALAYSAY
18 Dua nga Evelyn ken Siak
     Linda T. Lingbaoan
26 Natalged Kadi Dagiti Mula a Genetically Modified?
     Reynaldo E. Andres

KOMIKS
35 Kimar
38 Gayang ni Lamang
41 Miks & Tiks

KOLUM
10 Saludsodem ken ni Apo Hues
17 Okeyka, Apong
21 Dear Doc
22 Haytek!
24 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
20 Siled ti Kararag
23 Kasano nga Ibiahe ti Taraken nga Aso?
29 Idi Un-unana a Panawen
32 Ammuem Pay Dagitoy
34 Tapno Nalaklaka ti Panangiwakas Kadagiti Aramid iti Kosina
43 Ti Gasatmo Ita a Lawas
46 Dagiti Pabula ni Aesop

Blue Lagoon

BLUE LAGOON. Sakbay a dumteng dagiti adu a turista iti nalinak a baybay iti Blue Lagoon a masarakan iti Brgy. Balaoi, Pagudpud, Ilocos Norte, daldalusan dagitoy nga empleado iti maysa a beach resort ti aplaya kadagiti ruot ti baybay ken sumagmamano a plastik a botelia ken plato nga styro a basta lattan inwara dagiti dadduma a nagpipiknik. (Leilanie G. Adriano)

(Naipablaak iti Bannawag, Mayo 23, 2016 a bilang.)

Pannakasalaknib ti nakaparsuaan, napateg iti pannakapataud ti umdas a taraon

Kinuna ni Senator Cynthia Villar nga iti babaen ti panangaywan iti nakaparsuaan, masigurado ti gobierno ti saan a panagkurkurang ti taraon a para kadagiti umili.

Kinuna ni Villar nga iti ania man a patangan maipapan iti seguridad iti taraon ken kaadda ti umanay a rekursos, mainanaig latta ti pannakasalaknib ti nakaparsuaan wenno pannakasalaknib ti daga ken danum a gapu met ti panangitantandudona iti organiko a panagtalon, agrikultura a makaipaay iti umdas a taraon, ken agro-ecology.

Innayon daytoy a kangrunaan koma a maikkan iti pateg dagiti agroecological methods nga agdama a maus-usar tapno mapaadu pay ti apit iti agrikultura iti laksid ti agtultuloy a pannakaungaw dagiti natural a kinabaknang ti pagilian.

Gapu ta umab-aboten iti 38 porsiento ti pannakadaddadael dagiti pagtatalonan iti pagilian, impaganetget ti senadora ti kinapateg ti pannakakissay ti panagusar iti kemikal a ganagan ken insektisidio.

Kinuna pay ti senadora a nangina ti kemikal a pestisidio ken ganagan nga isu pay a mangikabassit iti maganar dagiti mannalon. Gapu iti daytoy, kinunana a maallukoy koma ngarud dagiti mannalon nga agaramid iti bukodda nga organiko a pestisidio ken ganagan, ken maipaayan koma dagitoy iti ramit ken panagsanay tapno maisayangkatda daytoy.


(Naipablaak iti Bannawag, Mayo 23, 2016 a bilang.)

Illegal recruitment iti social media, mapasardeng

Kiniddaw ni Labor Secretary Rosalinda Baldoz ti tulong dagiti umili iti kampania ti Philippine Overseas Employment Administration (POEA) kontra kadagiti illegal a recruiter a mangus-usar iti social media.

Kuna ni Baldoz nga us-usarenen dagiti illegal recruiter ti Internet, nangruna ti social media iti panangbiktimada kadagiti agsapsapul iti trabaho. Gapu iti daytoy, kunana nga igetan met ti POEA ti kampaniana kontra kadagitoy babaen ti bileg ti impormasion ken  teknolohia iti komunikasion tapno mapakaammuan ken masursuruan ti publiko.

Kuna ni POEA Administrator Hans Leo Cacdac a maysa a katinnulong ti ahensia iti daytoy a kampania ti Sven Group, maysa a digital agency, tapno masalakniban dagiti mangmangged a Filipino kontra iti illegal recruitment ken kadagiti scammer a mangus-usar met iti Internet kadagiti possible a biktimada.

Kuna ni Cacdac nga us-usarenen dagiti illegal recruiter ti Facebook, e-mail ken Twitter tapno maidur-asda ti illegal nga aramidda.

Innayon daytoy a nangrugin ti Sven Group, iti pannakitinnulong ti POEA, a mangisayangkat iti digital media a kampania kontra iti illegal-recruitment a maaw-awagan iti “ediWOW.”


(Naipablaak iti Bannawag, Mayo 23, 2016 a bilang.)

Dagiti Daing ni Ading

DAGITI DAING NI ADING. Kalpasan ti nagmalmalem a pannakaibilagna, inakasen ni Ellah Malazzab, 18, ti Caroan, Gonzaga, Cagayan ti indaingna a babassit a bulong-unas wenno bursawit. Reppetenna daytoy ket ilakona iti P20 ti tallo bukel. No por kilo met, malako iti P300 ti maysa wenno dua ramayan ti kadakkelna a bulong-unas. P800 met ti kababassitan a kasla kikit ti kaakabana a bursawit. Nupay balasang daytoy, saanna a samiren ti pudot ti init ken saanna met nga ibain ti agdaing ta ammona a makatulong daytoy iti pamiliana. (Roselyn C. Campano)

(Naipablaak iti Bannawag, Mayo 23, 2016 a bilang.)

MAYO 23, 2016

SARITA
4 Addanto Aldaw
   Remedios S. Tabelisma-Aguillon

NOBELA
8 Ni Anti Maring ken ni Triple M (9)
     Estela Bisquera-Guerrero
12 Ti Bastardo (10)
     Norberto D. Bumanglag, Jr.

DANIW
6 Ayabam Dagiti Kannaway
   Cherry Hazel Y. Reyes
22 Ipakanko Latta ti Karit
     Dexter M. Fabito
28 Sika a Nangsakup iti Ili
      Mikael R. Gallego
47 Daniw a Para Ubbing
     Marlyn G. Del Rosario

SALAYSAY
14 Ania ti Namnamaentayo iti Administrasion ni Duterte?
      Neyo Mario E. Valdez
26 Saganaan ti Epekto ti Panagbaliw ti Klima
     Reynaldo E. Andres

KOMIKS
35 Kimar
38 Gayang ni Lamang
41 Miks & Tiks

KOLUM
10 Saludsodem ken ni Apo Hues
17 Okeyka, Apong
20 Dear Doc
23 Haytek!
24 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
18 Ti Padas a Diakto Malipatan
19 Ania, Agsidsidaka iti Aso?
21 Siled ti Kararag
29 Idi Un-unana a Panawen
32 Ammuem Pay Dagitoy
34 Biodegradable Wenno Reusable a Supot ti Usaren?
43 Ti Gasatmo Ita a Lawas
46 Dagiti Pabula ni Aesop

Agin-inana a Dadapilan

AGIN-INANA A DADAPILAN. Madlaw a nabayagen a nakumotan daytoy a dadapilan a masarakan iti sakaanan ti bantay iti wangawangan ti Marag, Luna, Apayao. Nagbalinen a kakalamansian ken kamaisan iti asidegna a saan ketdi nga unas madapil a paggapuan ti bennal a maaramid a tagapulot, basi wenno suka. Nalabit saanton a mausar ditoy ti dadapilan ken agbalinto laengen a naimnas a lagip ti panagsilsilamut dagiti ubbing iti malutluto a tagapulot wenno pampannanganda ditoy iti kaskaron. (Rolando A. Seguro, Jr.)


(Naipablaak iti Bannawag, Mayo 16, 2016 a bilang.)

Organiko a panagtalon, nasken a masuportaran, kuna ni Sen. Villar

Rumbeng unay a suportaran ti gobierno ti organiko a panagtalon nangruna ket nalawag nga adda bentahe ti Filipinas iti daytoy a tay-ak no maidilig kadagiti kakaarrubana a pagilian iti Souteast Asia, kas kinuna ni Sen. Cynthia Villar.

Kuna ni Villar iti maysa a kombension itay nabiit a maysa nga agrikultural a pagilian ti Filipinas ket ngarud ekspertotayo koma kadagiti mainaig iti agrikultura.

Innayon ‘toy pangulo ti Senate Committee on Agriculture and Food a mabalintayo nga usaren dayta a pagekspertuan tapno ad-adu ti malako ti pagilian a produkto manipud iti talon kadagiti kakaarrubana a pagilian, kas kameng ti Asean Economic Community.

Sagudayen ti Republic Act No. 10068 wenno ti Organic Agriculture Act of 2010, kinuna ni Villar a masapul a di nababbaba ngem lima a porsiento ti agricultural farm iti Filipinas ti mapagbalin nga organiko itoy a tawen.

(Naipablaak iti Bannawag, Mayo 16, 2016 a bilang.)

Ladawan ti Agina nga Agta

LADAWAN TI AGINA NGA AGTA ITI PAGTAENGANDA ITI TUROD, LUNA, APAYAO. Tapno maital-o ti panagbiag daytoy a tribu ti Bayugao (Buyugao tribe), napirmaan itay nabiit ti maysa a Memorandum of Agreement on Sustainable Forest Management babaen ti panagkitinnulng ti Departament of Environment and Natural Resources (DENR), gobierno lokal iti Luna, Apayao State College ken ti Vision Help International Care Foundation tapno masursuruan dagitoy a mangtagiben iti kinabaknang iti aglawlawda ken agserbi a pagbiaganda iti naunday a panawen. Idi un-unana a panawen, awan masnop a pagindegan daytoy a tribu gapu iti nakairuamanda a kultura ken pagsapulan. No maibusen ti lames iti karayan wenno bunga ti mula iti bakir nga ayanda, mapanda manen agsapul iti sabali a lugar a pagbiaganda. Ngem babaen ti pannakasursuro dagitoy nga agtaraken kadagiti ayup ken agmula kadagiti nateng a mabalinda pay nga ilako, malaksid ti itutulongda iti gobierno nga agmula iti kayo ken mangsaluad iti nakaparsuaan, manamnama a sumayaat met ti panagbiag dagitoy gapu ta adda payen maipapaay a libre nga educational scholarship grant kadagiti ubbing nga Agta ket isudanto met iti tumulong kadagiti katribuanda iti masakbayan. (Leilanie G. Adriano)


(Naipablaak iti Bannawag, Mayo 16, 2016 a bilang.)

GF Awards Committee, agawaten iti nominasion para iti Bucaneg Award ken Florentino Award

Agawaten ti GUMIL Filipinas Awards Committee iti nominasion para iti 2017 Pedro Bucaneg Award ken 2017 Leona Florentino Award.

Dagitoy dua a pammadayaw ti kangatuan a pammadayaw a mabalin a maited ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, kadagiti mannurat nga Ilokano a nakatulong iti pannakasaluad ken pannakaparang-ay ti Literatura Ilokano.

Malaksid iti nominasion a para kadagitoy dua a pammadayaw, agawat pay ti Komite iti nominasion a para iti Don Cornelio Valdez Award. Maipaay met daytoy nga award kadagiti kameng ti GF a nakaipaay iti naisangsangayan a gapuanan a para iti isasantak ti gunglo.

Intuding ti Awards Committee ti Disiembre 31, 2016 a maudi nga aldaw a panagawatna iti nominasion.

Mapadayawan dagiti mapili nga umawat kadagitoy a pammadayaw iti Dap-ayan 2017: Ti Maika-49 a Nailian a Kombension Dagiti Mannurat nga Ilokano a maangay iti umay a tawen.


(Naipablaak iti Bannawag, Mayo 16, 2016 a bilang.)

MAYO 16 2016

SARITA
4 Pammadayaw
   Dexter M. Fabito
14 Paspasam, Dorot!
     Edilberto O. Ulep

NOBELA
8 Ni Anti Maring ken ni Triple M (8)
     Estela Bisquera-Guerrero
12 Ti Bastardo (9)
     Norberto D. Bumanglag, Jr.

DANIW
6 Dagitoy Kadi a Mata, Dagitoy Kadi a Bibig,  Dagitoy Kadi a Gurong?
    Arnold C. Baxa
22 Daydayamudomam Manen ti Dagaang
     Romel A. Pascua
31 Ammom La Ngaruden
     Neyo Mario E. Valdez
47 Daniw a Para Ubbing
     Jimmy R. Agustin

SALAYSAY
24 Dap-ayan 2016: Ne, Umub-ubing Dagiti Agessem iti Lengguahe ken Literatura Dagiti Ilokano!
   Leonardo S. Fagaragan
40 Makibagay Koma ni Mannalon iti El Nino
     Reynaldo E. Andres

KOMIKS
26 Miks & Tiks
28 Gayang ni Lam-ang (135)

KOLUM
17 Saludsodem ken ni Apo Hues
19 Dear Doc
20 Okeyka, Apong
32 Haytek!
34 Tips
35 Ading Kosinera
37 Kastoy, Kapid, Ditoy Hawaii
42 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
9 Netizone
10 Tao, Lugar, Pasamak
16 Biag ni Ilokano
21 Agkarkaramut ti Tarakenmo a Pusa?
23 Siled ti Kararag
33 Idi Un-unana a Panawen
36 Ammuem Pay Dagitoy
38 Adda Koma Pagrebbengan ti Tunggal Kameng ti Pagtaengan
39 Ti Gasatmo Ita a Lawas
46 Dagiti Pabula ni Aesop

Intayon Makidaklis!

INTAYON MAKIDAKLIS! Maysa a buya iti panagdaklis iti Caroan, Gonzaga, Cagayan. No kasta nga adda agdaklis, gundawayan met dagiti ubbing ti bakasionda tapno mapanda agpidut kadagiti maregreg nga ikan bayat ti panangsaplitda kadagiti simngat nga ikan iti iket. Sumirok dagitoy iti guyguyoden dagiti tattao nga iket nga ib-ibturanda ti mapulpulingan wenno mabasbasa makapidutda laeng iti yawidda a sidaen wenno ilakoda nga ikan. Saan met a paritan ti akinkukua iti daklis dagiti ubbing. (Roselyn C. Campano)

(Naipablaak iti Bannawag, Mayo 9, 2016 a bilang.)

Innem nga addang: Kasano ti agbotos itoy a Mayo 9?

Innem nga addang laeng ti rumbeng a laglagipen dagiti mapan agbotos kadagiti baro nga opisial ti pagilian itoy a Mayo 9, 2016.

Iti infomercial ti Commission on Elections (Comelec), naidetalye dagiti innem a simple nga aramiden dagiti botante, kas sumaganad:

1. Ammuen ti voting center ken polling precinct iti voters’ list wenno iti www.comelec.gov.ph.

2. Makipila iti holding area ti bukod a presinto. Umasideg iti Board of Election Inspector (BEI) ket ibaga ti naganmo ken voting precinct number.

3. Dawaten ti balota, folder, marker sa agderetso iti voting area.

4. Iserrek ti balota iti vote counting machine.

5. Agpaikabil iti indelible ink iti ramay ket alaen ken amirisen ti voter’s receipt nga ited ti BEI.

6. Ipisok ti resibo iti voter’s receipt receptacle wenno kahon a nailatang a para iti daytoy.

Kadagiti napalabas a lawas, inkampania ti Comelec dagitoy nasao nga addang babaen ti tulong ti mass media kadagiti shopping mall ken kadagiti terminal ti lugan.

Kuna ni Comelec Chairman Andres Bautista a kalikagumanda a mapan ti botante iti presinto nga adu ti ammona maipapan iti panagbotos; iti kasta, mapalaka ken mapaalisto ti panagbotos.


(Naipablaak iti Bannawag, Mayo 9, 2016 a bilang.)