Reyna ti Kawayan

REYNA TI KAWAYAN. Maysa a modelo a nagaruat iti makapataliaw a gown a nainaw manipud iti nalatak a Kawayan Festival ti Bangued, Abra ti nangtiliw iti imatang dagiti agbuybuya iti parada a naangay iti Crisologo Street iti Siudad ti Vigan idi rabii ti Oktubre 25 a pannakaangay ti nailian a salip a pakapilian ti mailaban iti world costume festival a maangay iti umay a tawen. Daytoy a pasken ti maysa kadagiti tampok ti pannakalukat ti 2015 Raniag: The Vigan Twilight Festival.  (Rinetrato ni Freddie G. Lazaro)

(Naipablaak iti Bannawag, Nobiembre 9, 2015 a bilang.)

Panaggatang iti botos, kada barangay itan – PPCRV

Dinillaw itay nabiit ti Parish Pastoral Council for Responsible Voting (PPCRV) ti maar-aramid itan a wagas ti panaggatang iti botos, innem a bulan sakbay ti eleksion inton Mayo 9, 2016.

Kuna ni PPCRV Chairperson Henrietta de Villa a no idi ket kada botante ti panaggatang iti botos, magatang itan ti botos ti sangabukel a barangay.

Segun ken ni De Villa, maysa a padi ti immasideg kenkuana a nangpaneknek iti daytoy— a sangaribu (Php1,000.00) ti presio ti tunggal bumario.

Kuna pay ni De Villa a daytoy a panaggatang iti botos ti kayat a paksiaten ti PPCRV babaen ti voter education program daytoy a “One Good Vote.”

Kiniddaw ni De Villa a magibusan koman daytoy panaglako/panaggatang iti botos wenno ti kasla pannakaibilbilang ti eleksion a kas maysa a negosio.

Segun ken ni De Villa, maikkan iti “One Good Vote” sticker dagiti lugar wenno pamilia a di umannugot iti vote buying ken vote selling.

Impalagip pay daytoy opisial ti PPCRV nga ibasar koma dagiti botante ti panagbotosda iti tallo a K: Karakter, Kabaelan (Kakayahan), ken Kinapudno (Katapatan).


(Naipablaak iti Bannawag, Nobiembre 9, 2015 a bilang.)

SHS early registration, inyalud-od ti DepEd

Inyalud-od ti Dept. of Education ti early registration para kadagiti sumrek iti Senior High School agingga iti Nobiemre 13, 2015 tapno maipanamnama a karamanda kadagiti nakaenrol iti SNS iti panaglukat dagiti klase inton Hunio 2016.

Makiddaw met kadagiti amin a class advisers dagiti agturpos iti Grade 10 itoy a tawen nga irehistroda dagiti estudianteda ken isubmitirda ti learners’ preferences dagitoy babaen ti SHS Registration Module in the Learner Information System (LIS) manipud iti Nob. 9 agingga iti 29, 2015.

(Naipablaak iti Bannawag, Nobiembre 9, 2015 a bilang.)

Dr. Dedicacion Agatep-Reyes, 92

Pimmusay ni Dr. Dedicacion Agatep-Reyes itay Oktubre 25, 2015. Rambakanna koma ti maika-92 a kasangayna inton Nobiembre 9. Kaingungot daydi Dr. Godofredo Reyes, na-gobernador ken nagdiputado iti Ilocos Sur, mabigbig met laeng a mangngagas ni Doktora Cion, awag dagiti kasingedna kenkuana a kas ken ni GSR.

Nalatak nga edukador, isu ti umuna a presidente ti University of Northern Philippines (1972-78), nagbise-mayor iti ilina a Sta Maria, I.S., nagbise-gobernador iti Ilocos Sur, ken nagpaay a Chairman ken Presidente ti St. Mary's College a pinundar daydi Doktor Reyes, agingga iti ipupusayna.

Malaglagipto ni Doktora Reyes a kas kangrunaan a timmulong ken ni GSR iti pannakatagibi ti GUMIL Filipinas iti 14 a tawen a panagpaay daydi GSR a presidente ti GF.

Dagiti agassawa ti nangsangsangaili kadagiti mannurat nga Ilokano iti tinawen a pannakaangay ti kombension ti GF iti uneg ti panagtakem ni Dr. Reyes a kas presidente.

Maysa kadagiti maipagpannakkel a patanor ti Sta. Maria, malaglagipto pay ni Doktora Reyes a kinatinnulong daydi Dr. Reyes a nangimanton iti uppat a sanga ti Clinica Reyes iti ilida ken iti Pangasinan ken iti Nueva Ecija.

Mabigbig pay ni Doktora Reyes gapu iti adu a pammadayaw a naipaay kenkuana manipud iti panagturpos a kas Summa Cum Laude iti Edukasion ken Magna Cum Laude iti Medisina iti UST, ken kas topnotcher iti Medical Board idi 1953. (Eliseo B. Contillo)

(Naipablaak iti Bannawag, Nobiembre 9, 2015 a bilang.)

NOBIEMBRE 9, 2015

SARITA
4 Baro a Gimong
    Rhea Rose D. Berroy

NOBELA
8 Operation: Drop Venus (38)
     Norberto D. Bumanglag, Jr.
12 Siak ni Precious (35)
     Juan Al. Asuncion

DANIW
6 Dimo Gamden ti Agpakada
    Reynaldo A. Duque
47 Dandaniw a Para Ubbing
     Gynelle D. Follante/Ronnie E. Aguinaldo

SALAYSAY
14 Ania Ngarud ti Aramidem No Adda El Nino?
      Virginia A. Duldulao, PhD
20 Adda Latta Met Dagiti Pasalsali
     Neyo Mario E. Valdez
38 Kasanon No Nayuper iti Danum ti Pinagayan?
      Villamor Visaya, Jr.
40 Kabaelam Met ti Agaramid iti MMSU Soil Booster
    Reynaldo E. Andres

KOMIKS
25 Gayang ni Lam-ang (109)
28 Aritosan (160)
30 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 TIPS
24 Haytek!
33 Kastoy, Kapid, Ditoy Hawaii
34 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 3 Tao, Lugar, Pasamak
18 Siled ti Kararag
19 Ania Ngarud Ita ti Taraknem?
22 Netizone
32 Ammuem Pay Dagitoy
35 Agaramidka iti Bukodmo a Ganagan
36 Iraman iti Plano Dagiti Pasamak a Di Mapakpakadaan
37 Ti Gasatmo Ita a Lawas
46 Dagiti Pabula ni Aesop

Naidumduma ti Kinaimas ti Tupig ti Currimao

NAIDUMDUMA TI KINAIMAS TI TUPIG TI CURRIMAO. Maisasaang iti pugon dagiti maluto a tupig iti Barangay San Simeon, Currimao, Ilocos Norte. Pagdidinnamagan ti kinaimas ti tupig iti Currimao gapu ta kas kuna dagiti agar-aramid, namnamsek iti nagadgad a niog ti lutlutuenda a tupig— ket daytoy ti sekreto ti naidumduma a ramanna malaksid pay kadagiti ingredienteda a baro a bellaay ken bennal. Saan laeng nga iti Paskua nga adda tupig iti Currimao ta masansan nga iti uray ania nga oras, adda latta lako a tupig iti abay ti merkado publiko iti San Simeon, Currimao, I.N. (Aileen R. Rambaud)


(Naipablaak iti Bannawag, Nobiembre 2, 2015 a bilang.)

Ad-adu a tignay kontra bullying, kalikaguman ti United Nations

Kidkiddawen ti United Nations (UN) ti ad-adu pay a tignay tapno mapukaw ti bullying ken cyber-bullying kadagiti ubbing.

Kuna ni UN Special Representative on Violence Against Children Marta Santos Pais nga ad-adu koma pay ti tignay a mangsalaknib kadagiti ubbing kontra iti bullying a mangbikbiktima ita iti minilion nga ubbing iti sangalubongan.

Kuna pay ni Pais a gapu iti panagbalbalin ti social media a kas paset ti biag dagiti ubbing, agbalbalinen a nayon a pakaseknan ti cyber-bullying a mangyasideg kadagiti ubbing iti peggad ti pannakaabuso iti wagas nga al-alisto ken nasaksaknap.

Kuna ni Pais nga ad-adda a maapektaran iti bullying dagiti ubbing nga addaan iti disabilidad ken dagiti sangsangpet iti baro a lugar a pagnaedanda ken dagiti agbakbakuit.


(Naipablaak iti Bannawag, Nobiembre 2, 2015 a bilang.)

Dua a mannurat, nagipila iti kandidatura iti Cagayan

Agpakanawan: Para Bokal Arthur P. Urata, Sr., Para Bise-Gobernador (agpapaay ita a Board Member) Atty. Mila Catabay-Lauigan, Para Gobernador (agdama a Bise-Gobernador) Leonides ”Odi” Fausto, Para Bokal Atty. Jessie B. Usita ken Reeleksionista a Board Member Vilmer V. Viloria.

Nagipila iti kandidatura a para Sangguniang Panlalawigan (Bokal wenno Board Member) iti Maika-2 a Distrito ti Cagayan da Vilmer V. Viloria ti Allacapan, Cagayan, ken Arthur P. Urata, Sr. ti Ballesteros, Cagayan, agpada a mannurat ken opisial ti GUMIL Filipinas (ti gunglo dagiti mannurat nga Ilokano iti Filipinas ken ballasiw-taaw) para iti nailian ken lokal nga eleksion inton Mayo 9, 2016.

Malaksid iti print media, agpada pay nga aktibo da Viloria ken Urata iti radio.

Awan liwatna kadagiti session ken committee hearings— Majority Floor Leader ti Sangguniang Panlalawigan iti 2001 agingga iti 2007, panggep ni Viloria a gun-oden ti maikalima a gundaway a panagserbi (nagtakem iti 1998-2007, sa iti 2013-2016).

Daytoy met ti umuna a gay-at ni Urata, retirado a Municipal Agrarian Reform Officer iti Department of Agrarian Reform (DAR).

Katiket da Viloria ken Urata a para Bokal ni Atty. Jessie B. Usita ti Abulug Cagayan (nagtakem a Board Member iti 2007-2013) iti salinong ti Nacionalista Party nga ibayog da Bise-Gobernador Leonides ”Odi” Fausto a para Gobernador, ken Board Member Atty. Mila Catabay-Lauigan a para Bise-Gobernador. (AST)

(Naipablaak iti Bannawag, Nobiembre 2, 2015 a bilang.)

Maika-49 nga anibersario ti GMM, maisagsagana

Ti pannakaangay ti maika-49 nga anibersario ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, ti mapagsasaritaan iti miting ti gunglo inton Nobiembre 8, 2015 iti Maceda, Sampaloc, Manila iti panangsangaili ni mannurat ti Bannawag Rhea D. Berroy.

Maangay ti nasao nga anibersario inton Disiembre 13, 2015 iti Golfhills Terraces Clubhouse, Old Balara, Quezon City a pakayalnagan metten ti agmakatawen a pannnakarambak ti Nabalitokan nga Anibersario ti GUMIL Metro Manila.

Iti pay nasao a pasken a manamnama a mayalnag dagiti baro a libro dagiti kameng ti GMM.

Para iti nayon nga impormasion, makiuman iti liderato ti GMM iti numero 0921 602 1938. (Anna Liza M. Gaspar)

(Naipablaak iti Bannawag, Nobiembre 2, 2015 a bilang.)

NOBIEMBRE 2, 2015

SARITA
4 Ti Magmagna a Kandela
   Rolando A. Seguro, Jr.

NOBELA
8 Operation: Drop Venus (37)
     Norberto D. Bumanglag, Jr.
12 Siak ni Precious (34)
     Juan Al. Asuncion

DANIW
6 Forest Park
   Cles B. Rambaud
32 Dipuntorum
     Ronnie E. Aguinaldo
38 Iti Laboratorio
     Rhea Rose D. Berroy
47 Dandaniw a Para Ubbing
    Jimmy R. Agustin/Johmar R. Alvarez

SALAYSAY
10 Kanser ti Suso: Malapdan ken Maagasan
      Virginia A. Duldulao, PhD
16 Ket Pinagungarda Dagiti Natay
     Fernando B. Sanchez
20 Nabileg Kadi ti Social Media iti Eleksion?
     Neyo Mario E. Valdez
24 Kasdiay Gayam ti Mayadayo
      Linda T. Lingbaoan
40 Tapno Di Aglungtot ti Ubbak ken Bulong ti Pagay
    Reynaldo E. Andres

KOMIKS
25 Gayang ni Lam-ang (108)
28 Aritosan (159)
30 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Haytek!
33 Okeyka, Apong
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 3 Tao, Lugar, Pasamak
9 Neti Zone
18 Siled ti Kararag
19 Ti Timel Ken Dagiti Taraken
34 Ammuem Pay Dagitoy
37 Tapno Makissayan ti Wara iti Pagtaengan
39 Ti Gasatmo Ita a Lawas
46 Dagiti Pabula ni Aesop

Ubbingda Pay Ngem Masursuruandan nga Agmula

UBBINGDA PAY NGEM MASURSURUANDAN NGA AGMULA. Dagiti ubbing nga agad-adal iti Puritac-Dalayap Elementary School, Pinili, Ilocos Norte iti panagsursuroda nga agmula iti natnateng iti ikub ti pagadalanda iti babaen ti programa a “Gulayan sa Paaralan” ti Departamento ti Edukasion. Babaen itoy, maipasagepsep kadagiti ubbing ti kinapateg ti panagmulmula a kas pamataudan iti pagbiag ken iti kinapateg ti panagsida iti natnateng tapno mataginayon ti kinasalun-at ti bagi. (Aileen R. Rambaud)

(Naipablaak iti Bannawag, Oktubre 26, 2015 a bilang.)

Makibiangkayo, kuna ti Comelec kadagiti botante

Inyalnag ti Commission on Elections (Comelec) itay Oktubre 12 ti kampania tapno gutigotenna dagiti botante a makibiang iti lokal ken nailian nga eleksion inton Mayo 9, 2016.

Nayam-ammo ti proyekto a “PILIPINAS 2016, Tamang Pagboto, Tamang Pagbilang” babaen dagiti opisial ti Comelec iti panangidaulo ni Chairman Juan Andres Bautista. Naigiddan ti pormal a pannakaipakaammo daytoy iti rugi ti panagipila iti kandidatura dagiti kandidato.

Inlawlawag ni Bautista a pagrebbengan ti tunggal umili ti makiraman iti panagbotos idinto a pagrebbengan ti Comelec a bilangen a husto dagiti botos.

Segun kadagiti opisial, usarenda dagiti nadumaduma a wagas ti social media tapno maitandudo ti nasao a proyekto.

Iti sabali a bangir, naisardeng ti panagparehistro dagiti botante iti Oktubre 12 agingga iti 16 gapu iti pannakakumikom ti Comelec iti rehistrasion dagiti kandidato. Nupay kasta, maituloy ti rehistrasion dagiti botante iti Oktubre 17 agingga iti Oktubre 31 a panaggibus daytoy.


(Naipablaak iti Bannawag, Oktubre 26, 2015 a bilang.)

Agsagsaganan ti GF iti pannakaangay ti Dap-ayan 2016 iti Luna, Apayao

Ita pay, agsagsaganan ti GUMIL Filipinas iti panangangayna iti Dap-ayan 2016, ti kangrunaan a panagtataripnong dagiti mannurat nga Ilokano iti 2016, a maangay inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao iti panangsangaili ti GUMIL Apayao nga idauluan ni Apayao Board Member Remy Albano.

Mainaig itoy, daytoy a taripnong ti kangrunaan a mapagsasaritan iti maikatlo a regular a board meeting ti GUMIL Filipinas (GUMIL) inton Nobiembre 15, 2015 (saan a Nobiembre 22, kas immuna a naipakaammo).

Maangay ti board meeting iti SP Kiosk, Cagayan Provincial Capitol, Tuguegarao City iti panangsangaili ni Cagayan Board Member Vilmer V. Viloria ken ti GUMIL Cagayan nga idauluan ni Dr. Freddie Pa. Masuli, kas impakaammo ni Arthur P. Urata, Sr., presidente ti GUMIL.

Kinuna ni Arthur P. Urata, Sr., presidente ti GF, a nasken a maurnos amin a banag a mainaig iti nailian a kombension ti GF iti kabiitan a tiempo tapno maserbian met a nasayaat ti GF dagiti kamengna, nangruna dagiti aggapu iti ballasiw-taaw.

Malaksid kadagiti opisial ken mammagbaga, manamnama ti yaatendar dagiti presidente dagiti GUMIL chapters iti nasao a miting.

Para iti idadar-ay, makiuman iti asino man kada Dr. Masuli (0998 559 1712), BM Viloria (0915 984 2149) ken GF Pres. Urata (0927 792 7913). (NME Valdez)


(Naipablaak iti Bannawag, Oktubre 26, 2015 a bilang.)

OKTUBRE 26, 2015

SARITA
4 Bannuar Syndrome
   Aileen B. Serrano

NOBELA
8 Operation: Drop Venus (36)
     Norberto D. Bumanglag, Jr.
12 Siak ni Precious (33)
     Juan Al. Asuncion

DANIW
10 Kiring
      Delfin P. Dumayas
47 Dandaniw a Para Ubbing
      Jimmy R. Agustin/ Ariel S. Tabag

SALAYSAY
16 Napateg ti Tunggal Tedted (3)
      Virginia A. Duldulao, Ph.D.
20 Malaglagipko da Angkay ken Angket
     Linda T. Lingbaoan
40 Ammuem No Ania a Pagay ti Rumbeng iti Talonmo
    Reynaldo E. Andres

KOMIKS
25 Gayang ni Lam-ang (107)
28 Aritosan (158)
30 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Haytek!
33 Kastoy, Kapid, Ditoy Hawaii
34 Ading Kosinera
36 Okeyka, Apong
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 3  Tao, Lugar, Pasamak
9 Neti Zone
18 Siled ti Kararag
19 Timel Laeng, Dimo Kunkuna
24 Salip iti Sarita ti 18th AMMAFLA
32 Ammuem Pay Dagitoy
35 Dadduma Pay a Tips iti Panangikabassit iti Basura
37 No Apay a Napateg ti Musika iti Biagtayo
38 Ti Gasatmo Ita a Lawas
39 Agmulaka iti Azolla
46 Idi Un-unana a

Ganesha Mahotsov 2015

GANESHA MAHOTSOV 2015. Rinambakan dagiti kameng ti Indian Students Organization (ISO) iti University of Northern Philippines, Vigan City, ti umuna a “Ganesha Mahotsov 2015” a kas panagdayaw dagiti Hindu iti didiosenda a ni Loerd Ganesh (Ganpati) itay Septiembre 17-21, 2015. Naangay ti parambak iti Founder’s Plaza ti pagadalan a nakaikabilan ti damili nga estatua a naarkosan iti sabsabong, bulbulong ken dadduma pay. Kalpasanna, naaramid ti inaldaw a panagkararag (Puja) tapno dawatenda ti  pigsa ken panagtaeng ti didiosenda iti uneg ti imahen ket naidaton ti insenso, makmakan ken dadduma pay a banag a makaay-ayo iti didiosen. Segun kadagiti Hindu, pagayatan ni Brahma (creator) a masapul nga agdawat iti pammendision ni Ganesha sakbay a mairugi ti maysa a proyekto wenno napapateg nga aramid. Ta no saan, agbalin nga awan mamaay dayta a ganuat. Nagngudo ti parambak iti pannakaipaanud ti estatua iti Mindoro Beach, Vigan City a kas simbolo ti siklo ti pannakaparsua a ti tao a naaramid iti pitak ken agsubli met laeng iti pitak/daga. (Teksto: Alma Campos-Somera/ Rinetrato ni Jay Chauhan)


(Naipablaak iti Bannawag, Oktubre 19, 2015 a bilang.)

Kabaelak Pay!

KABAELAK PAY! Dina kayat ti paduduolan, kaykayat ni Apong Baket ti agsapul iti bukodna a pagbiag, kas iti panangasikasona iti aglawlaw ti Ballesteros District Hospital, Ballesteros, Cagayan. Ken kas kadagiti dadduma a nataengan, sapulen kano ti bagina ti panagkuditkudit tapno di daras nga agrakaya. (Jobert M. Pacnis)

(Naipablaak iti Bannawag, Oktubre 19, 2015 a bilang.)

DepEd, intudingna ti Oct. 2015 a kas SHS Early Registration Month

Intuding ti Departamento ti Edukasion ti Oktubre 19-23 a kas Senior High School Early Registration para iti School Year 2016-2017.

Panggep ti Early Registration nga ipanamnama ti pannakastrek amin a nakalpas iti Junior High School (JHS) wenno Grade 10 iti SY 2015-2016 iti SHS program.

Bayat ti Early Registration, idatag dagiti estudiante iti Grade 10 iti SY 2015-2016 kadagiti class advisers-da iti nakompleto nga SHS Preference Slip a nakailanadan dagiti pilida a pagadalan ken programa (kayatda nga adalen). Kalpasanna, irehistro met dagiti class advisers dagiti estudianteda babaen ti Learner Information System (LIS).

Dagiti met nagturpos iti hayskul sakbay ti pannakaipakat ti K to 12 Program, dagiti PEPT and A&E Test Passers, ken dadduma pay nga estudiante iti ruar ti formal system nga interesado a sumrek iti SHS, mabalinda ti agparehistro kadagiti pagadalan a mangididiaya iti SHS babaen ti panangusarda iti SHS Registration Form. (DepEd Regional Office No. 02)


(Naipablaak iti Bannawag, Oktubre 19, 2015 a bilang.)

Panagparehistro dagiti botante, agingga iti Okt. 31, kuna ti Comelec

Agingga laeng iti Oktubre 31 ti panagparehistro dagiti botante ket saanen a mayalud-od pay, kas kuna ti Commission on Elections (Comelec).

Kuna ti nasao a komision a kalpasan ti nasao a deadline, iturongna metten ti imatangna kadagiti dadduma a pagrebbengan daytoy para iti automated nga eleksion inton Mayo 2016.

Pinalagipan ni Comelec Chairman Andres Bautista ti publiko a saanda koman nga urayen ti maudi a minuto sa mapanda kadagiti opisina ti Comelec tapno agparehistro wenno maalaan iti biometrics data.

Nangrugi ti panagrehistro dagiti botante idi Mayo 6 itoy a tawen. Ngem kas kuna ti Comelec, mapan nga agarup uppat a milion ti saan pay a nangidatag iti biometrics data-da.

Segun iti Comelev, saan a mapalubosan nga agbotos dagiti awanan iti biometrics data.

Manamnama nga agarup 53-milion a rehistrado a botante ti agbotos iti eleksion inton Mayo 2016.


(Naipablaak iti Bannawag, Oktubre 19, 2015 a bilang.)

OKTUBRE 19, 2015

SARITA
4 Darat
   Fernando B. Sanchez
   
NOBELA
12 Operation: Drop Venus (35)
     Norberto D. Bumanglag, Jr.
16 Siak ni Precious (32)
     Juan Al. Asuncion

DANIW
9 Apros
   Roy V. Aragon
47 Dandaniw a Para Ubbing
    Jimmy R. Agustin/Elmer L. Lopez

SALAYSAY
10 Napateg ti Tunggal Tedted (2)
      Virginia A. Duldulao, Ph.D.
18 Napanak Met iti Kasangay Daydi FM
      Jose A. Bragado
20 “Necropolitics”: Ibotostayo Ida Gapu iti Lagiptayo Kadagiti Pimmusay
     Neyo Mario E. Valdez
38 Naimas ti Miki ni Miles
     Rogelio E. Valdez, Jr.
40 Rey Andres Article
    Reynaldo E. Andres

KOMIKS
25 Gayang ni Lam-ang (106)
28 Aritosan (157)
30 Miks & Tiks

KOLUM
14 Saludsodem ken ni Apo Hues
15 Dear Doc
19 Okeyka, Apong
23 TIPS
33 Kastoy, Kapid, Ditoy Hawaii
34 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Neti Zone
22 Tapno Mapaksiat Dagiti Uleg: Agtaraken iti Pusa
24 Siled ti Kararag
32 Ammuem Pay Dagitoy
35 Tapno Maikabassit ti Basura
36 Ti Panangimaton, Saan nga Agpannuray iti Sentido Komun
37 Ti Gasatmo Ita a Lawas
46 Idi Un-unana a Panawen

Sinanglaw ti Candon

SINANGLAW TI CANDON. Bigbigat pay laeng ngem agpipilan dagitoy a kostumer iti maysa a pagsinanglawan iti San Antonio, Candon City tapno maramananda ti pagdidinnamagan ti kinaimasna a sinanglaw iti siudad. Iti P35 laeng iti kada malukong, mapnekkan iti napudot ken nakaramraman a napaalseman bassit a kaldo ti nalauya a naguneg ken laslasag ken kudil ti ulo ti baka, a matempla iti sadiwa a pinespes/papait sa mawarakiwakan iti nair-irap a lasona. Nasken a masapaka tapno saanka a maibusan iti daytoy a nalatak a pagsinanglawan ta awan pay alas dies iti bigat, naipuni aminen ti nailuto a sinanglaw a para iti dayta nga aldaw. Ti sinanglaw ti maysa kadagiti kalatakan a delicacy iti Ilocos Sur a kadua ti empanada, ukoy ken longganisa ti Vigan. (Teksto: Roy V. Aragon/ Retrato: Cles B. Rambaud)

(Naipablaak iti Bannawag, Oktubre 12, 2015 a bilang.)

Nakaro nga El Niño, paspasarenen ti pagilian

Impakaammo ti Philippine Atmospheric, Geophysical and Astronomical Services Administration (PAGASA) itay lawasna a nangrugin ti nakaro nga El Niño iti pagilian.

Kinuna ni Anthony Joseph Lucero, climate monitoring section head ti PAGASA, a naaboten ti pagrukodan tapno maideklarar ti iseserrek ti nakaro nga El Niño kalpasan ti tallo a bulan a pannakapalpaliiwna.

Kas kinuna ni Lucero, nakitan ti pagilasinan ti nakaro nga El Niño idi Hulio. Nupay kasta, intultuloyda a pinalpaliiw daytoy a kasasaad ti panawen iti tallo a bulan sakbay nga impakaammoda ti kaadda daytoy.

Kuna ti PAGASA nga idateng daytoy nga El Niño ti temperatura a nangatngato iti 1.5 degrees Celsius ngem iti temperatura a mangidateng iti gagangay a tikag.

Kuna ti ahensia a gapu met iti daytoy, mabalin a mapasaran ti nakaro a tikag ti 58 porsiento ti pagilian sakbay nga agtapos ti tawen ket posible a ngumato pay iti 85 porsiento inton makalas-ud ti umay a tawen.

Inlawlawag ti PAGASA a ti nakaro nga El Niño a mapasaran ita ti pagilian ket kapadana ti El Niño a nangigubuag iti nakaro a tikag a napasaran ti pagilian idi 1997 agingga iti 1998, a karaman iti uppat a kakaruanen a tikag iti pakasaritaan ti pagilian.

(Naipablaak iti Bannawag, Oktubre 12, 2015 a bilang.)

Dap-ayan 2016 ti GF, mapagsasaritaan

Ti Dap-ayan 2016 ti kangrunaan a mapagsasaritan iti maikatlo a regular a board meeting ti GUMIL Filipinas (GUMIL), ti gunglo dagiti mannurat nga Ilokano, inton Nobiembre 22, 2015.

Maangay ti board meeting iti SP Kiosk, Cagayan Provincial Capitol, Tuguegarao City iti panangsangaili ni Cagayan Board Member Vilmer V. Viloria ken ti GUMIL Cagayan nga idauluan ni Dr. Freddie Pa. Masuli, kas impakaammo ni Arthur P. Urata, Sr., presidente ti GUMIL.

Sangailien met ti GUMIL Apayao babaen ti panangidaulo ni Apayao Board Member Remy Albano ti Dap-ayan 2016: Maika-48 a Nailian a Kombension ti GF inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao.

Malaksid kadagiti opisial ken mammagbaga, manamnama ti yaatendar dagiti presidente dagiti GUMIL chapters iti nasao a miting.

Para iti idadar-ay, makiuman iti asino man kada Dr. Masuli (0998 559 1712), BM Viloria (0915 984 2149) ken GF Pres. Urata (0927 792 7913). (NME Valdez)

(Naipablaak iti Bannawag, Oktubre 12, 2015 a bilang.)