WEN, ‘bagis, adda gayamen pelikula dagiti Ilokano nga ubbing!
Ammo kad’ met ni Ilokano ti agaramid iti pelikula, kunam? Ah, ket mariroka, ta itay laeng nabiit, iti GUMIL Filipinas Convention iti Cubao, nai-launch ti pelikula a “Naspak ‘Di Sangat’ Mangga!”
Indirehe ken im-produce daytoy ti maysa kadagiti beterano a mannurat ken edukador nga Ilokano a ni Joel B. Manuel, prinsipal iti Banna National High School (Banna NHS), Banna, Ilocos Norte.
“Ania met ta puro la Ingles ken Tagalog dagiti pelikulan, awan la ti Ilokanon!” kuna man ni ‘Bagis Joel idi mainterbiumi. “Ilokano mammet, uray kitong-kitong laeng!”
Isu a pinadasna kano ti nangiprodius. Saan kano nga indie film, rebel film kano ti awagna kadagiti pelikula iti lengguahe a saan nga Ingles wenno Tagalog.
Dagiti aktor ken aktresna: dagiti estudiantena iti Literature, Journalism and Performing Arts iti Banna NHS. Nagserbi a katulonganna iti produksion ni Rolando D. Tubera, kaduana a mannursuro ken mannurat iti nasao a pagadalan.
* * *
“Simple pay laeng ti sarita ngem ti napateg, addan pamalpalatpatan no kasano ti agaramid iti pelikula nga Ilokano,” innayon ni ‘Bagis Joel.
Kasta met ti narikna dagiti nagakem a da Jessie A. Bagcal, Nick Harold Gajonera, Josephine Paula Acedo, Niña Fatima Valenzuela, Raissa Mae C. Rañada, Mark Anthony Pascual, Jeremy Asuncion, Jhelica Alegre, Rio Mark Sacatrapuz, Ria Gennette Gajonera, Jed Patrick Gajonera, Maynard Balinong, ken Theody Bruce Alexander U. Pascua ken Cherry Ann Ramos.
“Napateg a padas ti panagakemmi iti pelikula nga Ilokano, nagbalinkami a na-bravo,” kinuna ni Jessie A. Bagcal, nagakem a kas Lovejoy, maysa a bakla, iti nasao a pelikula.
“Narigat gayam ti agsiuting, adu a take!” kinuna met ni Niña Fatima Valenzuela a nagakem a kas Maymay.
“Kuna ni Direk Joel, riknaenmi ti akmenmi, ket dayta, feel-mi met,” insarurong met da Nick Harold Gajonera ken Josephine Paula Acedo, dagiti agka-love team iti nasao a pelikula.
* * *
Na-shooting ti pelikula iti Brgy. Bugasi ken iti sentro ti Banna, Ilocos Norte babaen ti pannakausar ti bassit a binulodda a camcorder.
Mano ti budget-na? Immisem ni ‘Bagis Joel. Bassit-usit a pamerienda kadagiti ubbing nga aktor, inggatang iti pag-edit a software ken bayad ti CD tapno mapaadu ti kopiana. “No budget film” kano, ‘bagis.
* * *
Ania ti istoria ti pelikula, ‘bagis?
Dua a pamilia, maysa a nabaknang ken maysa a nakurapay daytoy, ‘bagis. Dagiti ubbing ti namnama ti pamilia, ket no agpursige dagitoy, agballigida ngem no agamay-amayda, awan papananna no di matippuog ti pamilia.
Ken idi binuyak, awan la ti sarday ti pugakgakko, ‘bagis! Nakaay-ayat!
* * *
Kuna ni ‘Bagis Joel a pagsursuruan laeng daytoy, ket iti masanguanan, mabalinto payen a mapartuat dagiti ad-adu pay a pelikula nga Ilokano. Plano ni ‘Bagis Joel nga iprodius ti “Oh, My Candida!” a nobelana ken ti saritana a “Desgrasiado” iti masanguanan. Agpada a naipablaak dagitoy iti Bannawag, ‘bagis.
Kabayatanna, adda pay isagsagana ni ‘Bagis Joel nga ababa a pakpakatawa a pelikula a rummuar iti mabiit, “Ti Kaldero ni Tata Kanuto.”
Kayatmo a buyaen ti pelikula dagiti ubbing nga Ilokano, ‘bagis? Teksam ni ‘Bagis Joel iti selponna a 09209770730 tapno agorderka iti kopia.—O
(Agpapaay a Presidente ti FAMAS, mabuya ni Kabagis Eloy kas host iti “Tsismax” iti Global News Network Cable Channel tunggal Biernes, alas sais iti sardam, ken adda replay-na kada Sabado iti alas nuebe iti agsapa ken kada Huebes iti alas dose iti tengnga’t aldaw. Mabuya pay daytoy iti gnntv-asia.com.
Iti sabali a bangir, tunggal Sabado, iti alas nuebe agingga iti alas onse iti bigat, maang-angay iti Tiara Oriental Hotel, Makati City ti “Celebrity Hour,” panagtitipon dagiti celebrity iti agduduma a tay-ak a koberan ti media. No interesado nga ag-guest, ag-text wenno umawag iti 0932 242 7787.—AST)
(Naipablaak iti Bannawag, Mayo 11, 2015 a bilang iti kolum a "Di Pay Naluto, Naibusen" ni Angelo 'Eloy' Padua.)
