January 29, 2016

Dapon iti Maysa a Parbangon



DAPON ITI MAYSA A PARBANGON ti Domingo iti merkado publiko iti Curva, Pamplona, Cagayan. Parbangon pay laeng nga apagsipasip ngem makumikomen dagiti managsapsapa nga aglako ken aggatang, kas iti daytoy a paset ti pagkarnean a nakaatay-ayan ken nakaibitinan dagiti kapparti a baka ken nuang a para kappukan (ataata), sinanglaw (wenno pinapaitan), imbaliktad, bulalo ken dadduma pay. Kaaduan a masapa nga agudong dagiti tao a makidapon tapno makakamakamda a a makauraga iti nasasayaat a laslasag ken lalaem ta dagitoy ti umuna ken mabiit a maibus. (Roy V. Aragon)

(Naipablaak iti Bannawag, Pebrero 8, 2016 a bilang.)

Kandidato a gimmastos iti ginasut a milion, diyo ibotos – Santiago

Imballaag ni Sen. Miriam Defensor Santiago itay nabiit iti publiko ti dida koma panangsuportar kadagiti kandidato a gimmastos iti ginasut a milion a pisos iti anunsio iti politika idinto a saan pay met a nangrugi ti aktual a tiempo ti kampania.

Daytoy ti imballaag ti senador kalpasan a dagiti kalabanna iti politika ket gimmastos iti aganay a P2.3-bilion para iti televisiĆ³n ads manipud iti Enero agingga iti Disiembre 2015, nga indauluan ti kandidato ti Liberal Party a ni Mar Roxas, a gimmastos iti P774 milion; sumaruno ni Vice-President Jejomar Binay, P695 milion; Sen. Grace Poe, P694-milion; ken Davao City Mayor Rodrigo Duterte, P129-milion.

Kuna ni Santiago a masapul a saludsoden no kasano a mapasubli dagitoy makapaeskandao ti kinadakkelna a gastos— a ti simple a sungbatna ket agtakaw la ketdi dagitoy iti pondo wenno masulisogda a mangaramid iti daytoy. Wenno, ti mangipaay iti pabor kadagiti nagdonar para iti kampania, a pakaidagelan met ti pagimbagan dagiti umili.

Kas mangitantandudo iti gakat kontra iti nasapa a panagkampania, impalagip ni Santiago a masapul a gumastos laeng ti kndidato iti kinapresidente iti P10 iti tunggal botante, wenno addaan iti dagup a P545-milion para iti 54.5-milion nga agbotos inton Mayo 9.

Impalagip pay ni Santiago a ti sueldo ti Presidente ket P120,000 laeng iti binulan wenno P8.64-milion iti innem a tawen. Saan ngarud nga umanay dayta tapno mapasubli ti mangabak a kandidato ti ginastosna iti kampania.

Kuna ni Santiago a mabalin nga ibaga ti kandidato a naggapu ti gasgastuenna kadagiti nagdonar. Ngem asino dagitoy ken ania dagiti dawatendanto a pabor? sinaludsod pay ni Santiago.


(Naipablaak iti Bannawag, Pebrero 8, 2016 a bilang.)

Tejada, baro a presidente ti GUMIL Ilocos Norte

TEJADA
Nabotosan ni Mario T. Tejada a baro a presidente ti GUMIL Ilocos Norte, ti gunglo dagiti mannurat nga Ilokano iti Ilocos Norte, iti naangay nga eleksion ti gunglo itay nabiit.

Kakadua ni Tejada a nabotosaN da Leilanie G. Adriano (bise-presidente), Aileen R. Rambaud (sekretaria), Elmer Lopez (katulongan a sekretario), Avelina Fe Carlos-Camacho (tesorera), Adoracion Salantes (katulongan a tesorera), Ederlina Acantilado (PRO), Leonor R. Melchor (auditor), Daniel L. Nesperos ken Delfin Dumayas (business managers).

Kameng ti hunta direktiba da Narcisa Camacho Acosta, Milagros Sagadraca, Renato Taylan, Edna Nagtalon, Elma Santos, ken Rodolfo Godfrey Guittap.

Mamagbaga da Elizabeth Madarang-Raquel, Bannawag Editor Cles B. Rambaud, Joel B. Manuel, Severino Pablo, Rosario A. Bingayen ken Jorge Placido.

Maysa a mannaniw, agdama a sekretario ni Tejada iti konseho munisipal ti Piddig, Ilocos Norte ken bise presidente ti GUMIL Filipinas. (A.R. Rambaud)

(Naipablaak iti Bannawag, Pebrero 8, 2016 a bilang.)

PEBRERO 8, 2016



SARITA
4 Ti Aplikante
    Rolando A. Seguro, Jr.

NOBELA
8 Operation: Drop Venus (52)
   Norberto D. Bumanglag, Jr.
12 Siak ni Precious (50)
   Juan Al. Asuncion

DANIW
6 Nakem
    Mikael R. Gallego
19 2 a Daniw
     Cherry Hazel Y. Reyes
47 Daniw a Para Ubbing
      Jan Justin C. Rodriguez

SALAYSAY
14 Agsublin ti Puersa Dagiti Amerikano
     Neyo Mario E. Valdez
24 Napankami Met Idiay Marag Valley Rock Formation
      Aileen R. Rambaud
28 Baro a Teknik ti Panagpakan iti Tilapia
     Reynaldo E. Andres

KOMIKS
35 Kimar (11)
38 Gayang ni Lam-ang (121)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
16 Biag ni Ilokano
18 Netizone
20 Idi Un-unana a Panawen
21 Siled ti Kararag
22 Pakanek Kadi ti Asok iti Tulang?
32 Ammuem Pay Dagitoy
34 Adu ti Pakausaran ti Ukis ti Sitrus
43 Ti Gasatmo Ita a Lawas
46 Dagiti Pabula ni Aesop

January 25, 2016

Motor iti Agbibitin a Rangtay



MOTOR ITI AGBIBITIN A RANGTAY. Makalasat uray ti motorsiklo iti nalatak a Marag Hanging Bridge a mangballasiw iti Karayan Marag iti Tanap ti Marag iti ili ti Luna, Apayao. Nabingayen iti tallo a barangay (Marag, Cagandungan ken Calabigan), narigat a danonen daytoy a tanap a sigud a naawagan iti "no man's land" idi 1980-1990s a katibok ti insurhensia ken operasion military, ket kaaduanna a babaen ti motorsiklo (kasla habal-habal) a paglulubbonan ti lima katao wenno nasursurok pay ti pagluganan dagiti bumarangay a dumanon iti sentro ti Luna ken kadagiti kaparanget nga ili. Iti agdama, maikalkalawa ken makongkongkreto ketdi ti kalsada a dumanon iti Tanap ti Marag. Gapu iti daytoy, manamnama a mapasayaat ti transportasion iti nasao a lugar ta ad-adunton ti lugan a sumrek ken rummuar, kas kadagiti dyip, van ken mabalin a pati bus.(Roy V. Aragon)

(Naipablaak iti Bannawag, Pebrero 1, 2016 a bilang.)

100-aldaw a maternity leave, OK iti Senado

Inanamongan ti Senado ti gakat a mangipalubos iti pannakanayon dagiti benepisio iti maternity leave dagiti empleado a babbai iti publiko ken pribado a sektor agingga iti 100 nga aldaw uray ania ti wagas ti panaganakna.

Linugayan ni Sen. Pia Cayetano, pangulo ti Senate committee on women, children, family relations, and gender equality, ti pannakaaprobar ti Senate Bill No. 2982 iti maikatlo ken pinal a pannakaibasana ken nangesponsor iti nasao a gakat a mangamendar iti agdama a maipalubos a maternity leave a nababbaba ngem iti 98-aldaw a kababaan a rekisito iti International Labor Organization (ILO).

Iti agdama, ipalubos laeng dagiti linteg iti pannangged (labor laws) ti 60-aldaw a maternity leave a para kadagiti empleado iti gobierno idinto a 60 agingga iti 78 nga aldaw kadagiti empleado iti pribado a sektor, depende iti wagas ti panaganak.

Kuna ni Cayetano a maud-udin ti Filipinas no maidilig kadagiti pagilian iti rehion ti ASEAN iti tay-ak ti kabayag ti maternity leave.

Maam-ammonto a kas Expanded Maternity Leave Law of 2015, panggep ti nasao a gakat ti mangipaay iti umdas a tiempo ti panagtanggad tapno mapasublina ti salun-atna ken tapno maaramidna dagiti pagrebbenganna a kas ina sakbay nga ituloyna ti full-time a trabahona.

(Naipablaak iti Bannawag, Pebrero 1, 2016 a bilang.)

January 24, 2016

Libro ti dandaniw dagiti mannaniw a Tagalog, nayalnag



Kagiddan ti pannakarambak ti maika-30 a tawen ti Linangan sa Imahen, Retorika at Anyo (LIRA), nayalnag ti libro a napauluan LIRA 30: Tatlong Dekada ng Makatang LIRA iti The Oracle Hotel and Residences itay Disiembre 22, 2015.

Daytoy ti maikapat a libro nga impablaak ti nasao nga organisasion. Naitampok iti daytoy a libro dagiti Daniw a sinurat dagiti mannaniw a patanor ti LIRA iti uneg ti tallopulo a tawen. Inedit daytoy ni Fidel Rillo idinto a ni Michael Gallego ti nangdisenio.

Nayalnag met laeng ti nasao a libro itay Enero 19 iti Conspiracy Bar, Visayas Ave., Quezon City kas tampok iti Lirahan a binulan nga aktibidad ti gunglo iti nasao a bar.

Para iti kopia ti nasao a libro wenno saludsod maipapan iti LIRA, makiuman ken ni Mia Lauengco iti 0999 617 3476.

(Naipablaak iti Bannawag, Pebrero 1, 2016.)

January 22, 2016

PEBRERO 1, 2016



SARITA
4 Maysa nga Aldaw iti Biag ni Digay Lib-angan
     Rhea Rose D. Berroy
14 Marigatankanto La Ketdi
     Lolito Qui. Peig

NOBELA
8 Operation: Drop Venus (51)
   Norberto D. Bumanglag, Jr.
12 Siak ni Precious (49)
   Juan Al. Asuncion

DANIW
6 Adda Gayam Kenka
   Amado I. Yoro
47 Daniw a Para Ubbing
      Jobert M. Pacnis

SALAYSAY
16 Ammom Met Laeng No Ania Dayta In-inumem a Nasanger?
     Virgina A. Duldulao, Ph.D.
26 Tapno Di Bukboken Dagiti Apit a Bawang
     Reynaldo E. Andres
28 Agaramidtayo iti Apog
     Dexter M. Fabito

KOMIKS
35 Kimar (10)
38 Gayang ni Lam-ang (120)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
19 Dear Doc
23 Haytek!
24 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano
20 Idi Un-unana a Panawen
21 Siled ti Kararag
22 Saan a Taraon Laeng ti Kasapulan ti Aso
32 Ammuem Pay Dagitoy
34 Kasano a Makainut iti Koriente ti Ref?
43 Ti Gasatmo Ita a Lawas
46 Dagiti Pabula ni Aesop

January 17, 2016

Taoid Museum



TAOID MUSEUM. Nalukatan itay laeng kallabes ti Taoid Museum a maysa manen a baro a pagpasiaran iti Ilocos Norte. Iti ladawan, ipakpakita ni Stella Marie Gaspar, guide iti nasao a museo, kadagiti bisita a pakairamanan dagiti kandidato iti Mr. International dagiti nadumaduma a ramit ken alikamen (ethnic artifacts) dagiti nagkauna a tattao iti Cordillera, a puon dagiti sumagmamano a nagdappat iti probisia ti Ilocos Norte idi un-unana. Masarakan ti Taoid Museum iti puseg ti Siudad ti Laoag wenno iti abay ti Museo Ilocos Norte/Kapitolio Probinsial iti mismo a compound ti La Tabacalera Ilokano Lifestyle Center. Naipatakder daytoy a museo tapno maipakita ti pre-colonial side ti Ilokandia ken kas panangbigbig metten iti kontribusion dagiti katutubo a masarakan iti ili ti Nueva Era, Dumalneg, Carasi ken Adams iti Ilocos Norte. (Leilanie G. Adriano)

(Naipablaak iti Bannawag, Enero 25, 2016 a bilang.)

Gakat iti ‘farm tourism’ ni Villar, OK iti Kongreso

Manamnama ti ad-adda pay nga irarang-ay ti agrikultura iti pagilian iti panangaprobar ti Kongreso itay nabiit iti gakat ni Sen. Cynthia A. Villar nga agpanggep a mangparang-ay ken mangitandudo iti ‘farm tourism.’

Iti panagyaman ni Villar, chairwoman ti Senate agriculture and food committee, iti pannakaanamong ti gakat a nagpaayanna a kas kangrunaan nga autor, kinunana a dagiti field trip dagiti pagadalan, iramanda koma ti farm tourism tapno maitandudoda met kadagiti ubbing ti kinapateg ti agrikultura.

“Imbes nga ipantayo dagiti ubbing kadagiti lugar a mabalin pay a pakadesgrasiaanda, nasaysaysaat no ipasiartayo laengen ida kadagiti ‘farm tourism spots’ ken ‘agricultural wonders’ nga umad-adu itan iti pagilian,” kinuna ni Villar.

Dinakamat ni Villar ti Costales Nature Farms iti Majayjay, Laguna, a mangididiaya kadagiti edukasional ken fun activities a para kadagiti estudiante a kas koma iti panagpuros kadagiti nateng ken panagmula, panagtaraken kadagiti dingo, ken pannakayadal kadakuada ti pannangan kadagiti makapasalun-at a taraon.


(Naipablaak iti Bannawag, Enero 25, 2016 a bilang.)

Hoverboard, maiparit kadagiti ubbing – DoH, DTI

Binallaagan ti Department of Health (DoH) ken ti Department of Trade and Industry (DTI) ti publiko, partikular dagiti nagannak, kontra iti panaggatang iti uso ita a hoverboard para kadagiti annakda nga edad 14 agpababa, gapu iti mabalin nga ipaay daytoy a desgrasia.

Maibatay iti nagtipon a pakaammo ti DoH ken DTI, mabalin nga adda ipaay a risgo ti hoverboard kadagiti ubbing gapu pay iti imet daytoy a baterĆ­a a nangato ti boltahena.

Nadakamat iti advisory a kaaduan kadagitit hoverboard ti addaan iti 36-volt a baterĆ­a wenno nangatngato pay.

Segun kadagiti nasao nga ahensia, delikado daytoy ta limbes iti naikeddeng a 24 volts a baterĆ­a dagiti elektroniko nga ay-ayam.

Malaksid iti daytoy, mabalin pay a mangipaay iti aksidente ti hoverboard kadagiti ubbing gapu iti saan a natalged a posision ket narigat a kontrolen ken balansien ti board.

SegĆŗn iti DoH ken DTI, nakairekord ti Amerika kadagiti aksidente mainaig iti hoverboard kas iti pannakabullo, pannakatukkol, pannakaitim-og ti ulo, ken dadduma pay.


(Naipablaak iti Bannawag, Enero 25, 2016 a bilang.)

Serye ti interbiu kadagiti mannurat nga Ilokano, maiwayat

PANNAKAYALNAG TI “GMM @ 50”. Nayalnag ti agmakatawen a panagsagana para iti pannakarambak ti Maika-50 nga Anibersario ti GUMIL Metro Manila inton Disiembre 12, 2016 itay Disiembre 13, 2015. Manamnama a maiwayat dagiti serye ti interbiu ken lektiur, pannakaipablaak dagiti libro, eksibit, ken dadduma pay. Kakadua iti ladawan ni GMM President Ariel S. Tabag (kakanigidan) dagiti sumagmamano a pangamaen ken panginaen iti GUMIL Metro Manila a kas kada (agpakanawan): Eden Cachola-Bulong, Ma. Rosa Atencio-Cabie, Honor Blanco-Cabie, Dionisio S. Bulong, Jose A. Bragado, Vicente P. Palcong, Leonardo S. Fagaragan, Linda T. Lingbaoan-Bulong, ken Bannawag Editor Cles B. Rambaud. (Rinetrato ni Roy V. Aragon)


Iwayat ti GUMIL Metro Manila, ti gunglo dagiti mannurat nga Ilokano iti Kamanilaan, ti serye ti interbiu kadagiti mannurat nga Ilokano a maawagan iti “Innuman ken Inninuman” a kas paset dagiti proyekto a panagsagsagana para iti pannakarambak ti Maika-50 nga Anibersario ti GUMIL Metro Manila inton Disiembre 12, 2016.

Iti daytoy umuna a bansada a maangay iti daytoy Enero 24, mainterbiu da dati a Bannawag Editor Dionisio S. Bulong, dati a Bannawag Associate Editor Jose A. Bragado ken Eden Cachola-Bulong nga agpapada a dakkel ti naipaayna iti panangrugi ken panagrangpaya ti GUMIL Filipinas.

Da mannurat iti Bannawag Leonardo S. Fagaragan ken Dr. Zita Nepomuceno-Fagaragan ti mangsangaili iti pasken iti pagtaenganda iti
Kaunlaran Village, Caloocan City.

Maawis dagiti mannurat ken asino man nga Ilokano nga adda interesna iti Literatura ken Kultura nga Ilokano a tumabuno. Makiuman iti 0925 552 5277.

Para iti direksion, ag-text wenno umawag iti 0921 428 5950. (Anna Liza M. Gaspar)

(Naipablaak iti Bannawag, Enero 25, 2016 a bilang.)

January 14, 2016

ENERO 25, 2016



SARITA
4 Maysa a Balo ken Dua a Baak
   Estela Bisquera-Guerrero
18 “Truth or Consequence”
    Francisco B. Quitasol

NOBELA
8 Operation: Drop Venus (50)
   Norberto D. Bumanglag, Jr.
12 Siak ni Precious (48)
   Juan Al. Asuncion

DANIW
6 Daytoy Panagaw-awir Kasla Unibersidad
   Daniel L. Nesperos
47 Daniw a Para Ubbing
    Delfin P. Dumayas

SALAYSAY
14 Ania ti Masakbayan ti “Bangsamoro”?
Neyo Mario E. Valdez
26 Ad-adu ti Maapit Kadagitoy a Mais
     Reynaldo E. Andres
28 Wen, Napintas Met ti Sandia a Panguartaan
      Leilanie G. Adriano

KOMIKS
35 Kimar (9)
38 Gayang ni Lam-ang (119)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano
20 Idi Un-unana a Panawen
21 Siled ti Kararag
22 Panagtaraken iti Kalapati
32 Ammuem Pay Dagitoy
34 Nalanit a Bobeda ti Kosina?
43 Ti Gasatmo Ita a Lawas
46 Dagiti Pabula ni Aesop


January 10, 2016

UONG IDIAY BALLESTEROS



SIRARAGSAK da agkabsat a Jiemil Anne ken Jethro S. Pacnis ti Brgy. Ammubuan, Ballesteros, Cagayan kabayatan a kitkitaenda dagiti uong a mannagadu a naala ni tatangda iti ayan ti mula daytoy a pandan iti likud ti balayda. Naimas ti uong a madengdeng ken maadobo a malaokan iti bulbulong ti marunggay, saluyot ken paria. Nailako dagiti dadduma iti P5 ti maysa. (JMP)


(Naipablaak iti Bannawag, Enero 18, 2016 a bilang.)

NFA, agangkat iti bagas manipud iti Vietnam, Thailand

Panggep ti National Food Authority (NFA) ti agangkat iti ad-adu a bagas manipud iti Vietnam ken Thailand tapno maipanamnama ti umdas a suplay ti bagas iti sibubukel a 2016.

Iti laksid ti kaadda ti adu a bagas kadagiti bodega ti NFA iti nadumaduma a paset ti pagilian, kinuna ni NFA Administrator Renan B. Dalisay a nasken nga umangkat pay ti NFA iti bagas tapno maipasigurado a di agkurang ti pagilian iti bagas iti kanito nga agsagaba ti pagilian kadagiti kalamidad wenno iti rungsot ti nakaparsuaan iti 2016.

Di nakurkurang ngem 50,000 a tonelada a bagas ti manamnama nga angkaten ti NFA, kas kuna ni Dalisay bayat ti ipapasiar daytoy iti Caraga region itay lawasna.


(Naipablaak iti Bannawag, Enero 18, 2016 a bilang.)

Agannad kadagiti bogus a papadi, kuna ni Bishop Soc

Binallaagan ni Lingayen-Dagupan Archbishop Socrates Villegas dagiti kameng ti Simbaan Katolika iti Pangasinan maipanggep iti kaadda ti maysa a grupo dagiti lallaki a mangibagbaga nga isuda ket papadi iti ikub ti Ancient Catholic Church of the East.

Kinuna ti Obispo iti impaulogna a Circular 2016-2 a saan a Catholic group ti sekta, a kas ibagbaga ti grupo, ket di rumbeng a makipartisipar dagiti Katoliko iti seremonia dagitoy.

Innayon ti Obispo a maparitan pay daytoy a grupo a mangusar kadagiti kapilia ti Simbaan Katolika para kadagiti liturhiada nga umasping iti rito ti Simbaan Katolika.

Agpaay koma daytoy a pangriing kadagiti papadi a Katoliko a mapanda koma kadagiti away ta dagiti agnanaed kadagitoy a lugar, mawawda iti espiritual a pannakaywan ket dautoy met laeng ti gapuna a nalaka ida nga allilawen dagiti bogus a papadi, kinuna ti Obispo.


(Naipablaak iti Bannawag, Enero 18, 2016 a bilang.)

January 7, 2016

ENERO 18, 2016



SARITA
4 Dagiti Papa ni Hannah
    Ronelyn B. Ramones
18 Anangka
    Sinamar Robianes

NOBELA
8 Operation: Drop Venus (49)
     Norberto D. Bumanglag, Jr.
12 Siak ni Precious (47)
     Juan Al. Asuncion

DANIW
6 Busel Pay Laeng
   Johmar R. Alvarez
47 Daniw a Para Ubbing
    Leonora R. Melchor

SALAYSAY
14 Scam Ditoy, Scam Dita
     Virginia A. Duldulao, Ph.D.
26 Saan a Bulong ti Marunggay Laeng ti Abrawem
     Reynaldo E. Andres
28 Nakaramankan iti Bayuyo?
      Jobert M. Pacnis

KOMIKS
35 Kimar (8)
38 Gayang ni Lam-ang (118)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
15 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano: No Adda Dumteng a Sangaili
17 Dagiti Pagannurotan iti Salip iti Sarita ti 18th AMMAFLA
20 Idi Un-unana a Panawen
21 Siled ti Kararag
22 Naragsak Met Laeng ti Tarakenmo a Billit?
32 Ammuem Pay Dagitoy
34 Kasano ti Panangaramat iti Kalendario ti Pamilia?
43 Ti Gasatmo Ita a Lawas
46 Dagiti Pabula ni Aesop

January 3, 2016

Kalpasan ti Agmalmalem a Nakapupokda iti Klasrum



KALPASAN TI AGMALMALEM A NAKAPUPOKDA ITI KLASRUM, makaaliwaksay dagitoy nga ubbing ken mannursuro iti isla ti Sabtang, Batanes babaen ti iruruarda iti kuartoda ket agtugawda iti bermuda grass iti sango ti maysa a simbaan a sango met laeng ti pagadalanda ket maipalagip dagiti inadal ken leksionda iti sumaruno a bigat. Presko ti angin ditoy ken makaay-ayo ti buya ti aglawlaw a buyogan ti panagbaliw ti maris ti tangatang sakbay ti ilelennek ti init. (Leilanie G. Adriano)


(Naipablaak iti Bannawag, Enero 11, 2016 a bilang.)

Espesial a miting ti GUMIL Filipinas: Enero 17



Maangay ti espesial a board meeting dagiti opisial ti GUMIL Filipinas inton Enero 17, 2016, 9 A.M. iti iti R. Albano Residence, Dagupan, Luna, Apayao iti panangsangaili ni Apayao Board Member Remy Albano, presidente ti GUMIL Apayao ken direktor ti GUMIL Filipinas (GF), kas impakaammo ni Arthur P. Urata, Sr., presidente ti GF.

Mapagsasaritaan iti nasao a miting ti panagsagana ti gunglo iti pannakaiwayat ti Dap-ayan 2016: ti Maika-48 a Nailian a Kombension ti GUMIL Filipinas inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao iti panangsangaili ti GUMIL Apayao.

Karaman pay a mapagsasaritaan ti maipapan kadagiti proyekto ti GF a kas iti panagipablaak iti libro, ken ti pannakaamendar ti konstitusion ti gunglo.

Malaksid kadagiti opisial, manamnama a dumar-ay dagiti amin a presidente dagiti chapter ti GUMIL iti Filipinas.

Para iti direksion, makiuman ken ni BM Albano iti 0928 607 3972. (NME Valdez)


(Naipablaak iti Bannawag, Enero 11, 2016 a bilang.)

Dekoriente a traysikel, dyip, mapaadu

Ti maysa kadagiti tallo a dekoriente a traysikel (e-trike) nga agbibiahe ita iti Intramuros, Manila. Saan a natagari ken saan nga agipugso iti asuk, apagpagisu unay ti e-trike iti Intramuros a maibilang a maysa kadagiti namsek-iti-pakasaritaan a lugar iti pagilian a pagaayat a paspasiaren dagiti turista. (Ali Vicoy)


Panggep dagiti agparpartuat kadagiti dekoriente a lugan ti panangpartuatda iti 6,000 a baro a dekoriente a dyip ken traysikel iti uneg ti tallo a tawen manipud iti agdama a 400 a yunit nga agtartaray ita kadagiti kalsada iti pagilian nangruna iti Kamanilaan.

Kuna ti Electric Vehicle Association of the Philippines (EVAP) a napagnunumuan a mangpartuatda iti 5,000 nga e-trike ken 1,000 nga electric jeepney kalpasan ti patangan iti nagbaetanda iti Department of Trade and Industry (DTI) itay nabiit a nangtaminganda iti EV Roadmap Action Plan.

Kinuna ni Rommel Juan, presidente ti EVAP, nga umad-adu ti interesado a maaddaan iti dekoriente a lugan gapu ta ‘environment-friendly’ dagitoy.


(Naipablaak iti Bannawag, Enero 11, 2016 a bilang.)

900 a baro a coast guard, kasapulan

Mapan a 900 a baro a coast guard ti alaen ti Philippine Coast Guard (PCG) itoy a tawen tapno masungbatan ti panagkurkurang ti tao ti PCG ken tapno mapapigsa ti puersa ti pagilian iti pannakabantay dagiti aplayana.

Mainaig ti panagkasapulan iti 900 a baro a uniformed personnel ti PCG iti idadateng dagiti baro a lugan-iti-taaw ti PCG manipud iti Pransia ken Japon.

Kinuna ni Rear Admiral William Melad, acting commander ti PCG, a matuloy ti panagrekrut ti PCG iti taona iti 2016 gapu ta nairaman daytoy iti badiet iti 2016, kas pinatagedan ti Dept. of Budget and Management.

Iti agdama, agdagup iti 8,807 ti personnel ti PCG a buklen ti 7,096 male non-officers, 847 female non-officers, 608 male officers ken 256 female officers.

Mapan met a 36,289 a kilometro ti kaatiddog ti aplaya ti Filipinas. Kuna ti PCG a rumbeng koma met a tunggal kilometro nga aplaya, bantayan ti maysa a coast guard. Kayat a sawen daytoy nga uray pay agrekrut ti PCG iti nayon a 900 a taona itoy a tawen, agkurkurang pay laeng iti personnel.


(Naipablaak iti Bannawag, Enero 11, 2016 a bilang.)

January 1, 2016

ENERO 11, 2016



SARITA
4 Maria Clarita, Mario Clarito
    Mary Antonette M. Ramos
24 Ta Sabali ti Langitko
   Eden L. Cachola

NOBELA
8 Operation: Drop Venus (48)
     Norberto D. Bumanglag, Jr.
12 Siak ni Precious (46)
     Juan Al. Asuncion

DANIW
6 Dagiti Pagtaengan
   Ria Rebolledo
47 Daniw a Para Ubbing
    Diana S. Macalos

SALAYSAY
14 Dagiti Sagut ti Baro a Tawen
     Fernando B. Sanchez
18 Apay a Kaay-ayoda ni Duterte?
     Neyo Mario E. Valdez
28 Barayti ti Lasona a Para iti Naladaw a Panagmula
     Reynaldo E. Andres

KOMIKS
35 Kimar (7)
38 Gayang ni Lam-ang (117)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano: Kasano a Mapukaw ti Maysa a Lengguahe
20 Idi Un-unana a Panawen
21 Siled ti Kararag
22 Ti Panagisbo ti Pusa iti Uneg ti Pagtaengan
32 Ammuem Pay Dagitoy
34 Agaramid iti Kalendario ti Pamilia
43 Ti Gasatmo Ita a Lawas
46 Dagiti Pabula ni Aesop